Me veshje tradicionale, gratë korrin grurin në Has

Në Has do të shkojmë për ta vizituar fshatin Romajë. Bukuritë natyrore, të kaluarën e pasur e zakonet që po vazhdojnë t’i ruajnë me xhelozi i kuptojmë tash bashkë.

Hasi njihet më së shumti për furrtari, për veshjet karakteristike të kësaj ane e edhe për kulturën që e veçon.

Edhe pse shumë prej traditave kanë mbetur si pjesë e së kaluarës, ka ende banorë të fshatit Romajë që i praktikojnë ato edhe sot.

Korrja e grurit me drapër nga gratë e vajzat e fshatit, që mbajnë veshjet hasjane, është një aktivitet që e shënon ardhjen e korrikut.

Edhe pse tash bujqësia ka avancuar, kjo traditë po kujtohet për të mos e lënë të kaluarën në harresë.

Pritja e mysafirëve në oda është bërë nëpër shumë vende të Kosovës, e në Romajë po vazhdon të jetë pjesë e përditshmërisë së tyre.

Shani Qenaj në odën e tij pret burrat e fshatit, ku bashkë luajnë lojëra e kërcejnë valle nën tingujt e muzikës folklorike.

Përpos si një vend që e ruan traditën, në Romajë ngado që e kthen kokën pamja është mbresëlënëse.

Kjo natyrë e pasur ua mundëson banorëve që edhe bujqësinë ta zhvillojnë e të përfitojnë prej saj.

Një pjesë e madhe e banorëve të Romajës kanë lënë vendlindjen në kërkim të një jete më të mirë në mërgim, por dashurinë për të e tregojnë duke e ndihmuar në mënyra të ndryshme.