Bima aromatike finoku, ka dy vjet që mbillet në Vitomiricë. Disa nga to kanë lule të verdha, por shumicës së finokut në parcelën e këtij fshati, tashmë i kanë dalë farat. Fillimisht ato kanë ngjyrë të gjelbër e pastaj, duke u tharë marrin ngjyrë kafe për t’i pritur korrjet e fundit të muajit, raporton KOHA.
Siç tregon menaxherja e “Organic Herb”, Violanda Morina, pavarësisht se tregu i Kosovës nuk e njeh shumë, ajo ka përdorime të ndryshme dhe po kërkohet nga tregu i Bashkimit Evropian. Kërcelli i finokut është thuajse i zbrazët, por janë tri pjesë të tjera të bimës që përdoren. Kërkesa e tregut gjerman deri më tani ka qenë vetëm për farën e kësaj bime, e cila përdoret edhe në mjekësi.
Sipas Morinës, kërkesa për të është më e vogël në raport me bimët e tjera aromatike siç është lulja e mëllagës. Sidoqoftë, ajo e rekomandon mbjelljen e kësaj bime për ata që kanë fusha të mëdha dhe pajisje për korrje. Nga produkti që e përpunon, ajo ka dalë e kënaqur dhe sipas saj, mbjellje do të bëjë edhe në vitin e ardhshëm. Këtë, do ta bëj me një sasi të farave për mbjellje.
Ndryshe, fara e finokut është e pasur me anti-oksidantë, fibra, mineralë të bakrit, hekurit e kalciumit dhe vitaminat A, E, C dhe ato B kompleks. Shija e kësaj fare është shpesh e ngjashme me pijet e forta alkoolike si uzoja greke apo rakia turke të cilat në përzierje me ujin e marrin ngjyrën e bardhë.
