Espresso e makiato nga trajneri i kafesë, i vetmi në Kosovë

Fatlum Spahiu ishte i ri në moshë kur nisi punën si shankist në një nga restorantet në vend.

Kërkesat e shumta për të shijuar kafe, e arti që bëhej gjatë përgatitjes së saj, Fatlum Spahiut filloi t’i bëhej pasion, e shumë shpejt u bë edhe profesionist i kësaj fushe, e tani njihet si trajner kafeje.

“Si çdo i ri që ka pasur qejf të punojë diçka, unë vendosa të punoj si shankist. Kur fillova punën, kam parë baristin duke bërë kafenë dhe aty fillova ta doja këtë punë. Fati e deshi që aty kanë ardhur disa trajnerë nga Italia për trajtimin e kafesë, dhe aty e përvetësova punën. Tani jam trajner kafeje. Unë shkoj në pikat ku kemi kafe dhe i mësoj ata ta përforcojnë kafenë që e bëjnë, dhe nuk besoj se ka trajnerë të tjerë si unë”, thotë Spahiu.

Sipas trajnerit, një kafe të jetë e shijshme dhe cilësore ka shumë faktorë, duke filluar që nga përzgjedhja e kokrrës së kafesë e derisa ajo të jetë e shërbyer në filxhan.

“Një kafe të mirë e bëjnë shumë faktorë, duke filluar nga kafeja që përdor, aparati, mulliri, uji e shumë faktorë të tjerë. Shankisti duhet ta ketë parasysh që në mëngjes duhet kontrolluar presioni dhe temperatura e aparatit, duhet shtypur kafeja dhe pastaj përgatitur. Kjo kafe, në momentin që hapet, nuk ka më jetëgjatësi, maksimumi duhet të qëndrojë 3 ditë, sepse e humb kualitetin e saj”, shton Spahiu.

Italia ishte vendi ku ai perfeksionoi zanatin e tij të kafesë, nga atje mësoi shumë teknika të shërbimit të kafesë, e tani atë po ua mëson të tjerëve.

“Kam pasur fatin që jam në këtë kompani, sepse kam pasur mundësinë të shkoj në Itali për të mësuar. Aty kam mësuar se si të bëj një kafe të mirë, aty kam mësuar dhe jo vetëm praktikuar. Edhe në Kosovë bëhet kafe e mirë, por më shumë është zanat sesa e mësuar teknikisht”, deklaron Spahiu.

Thotë se trendet e kafesë gjithherë e më shumë ndryshojnë, por pamja e kafesë duhet të jetë tërheqëse ashtu si edhe vetë shija e saj, njëra pa tjetrën nuk e përkufizojnë një kafe të mirë.

“Në momentin që fokusohemi vetëm në pamje, duhet ditur të trajtohet cilësia dhe arti. Ka që bëjnë art, por nuk është kafe e mirë është vetëm shtresa sipër që duket bukur. Unë preferoj të pi kafe daneze. Në Itali, në trajnim, kam parë shumë detaje; sidomos uji është faktor kryesor për një kafe të mirë, uji duhet të jetë i filtruar. Kafeja me sheqer nuk shijohet, sepse sheqeri ia humb vlerën kafesë”, shton Spahiu.

Trajneri i kafesë sugjeron të gjithë ata që duan të nisin një biznes me këtë fushë, që patjetër të kenë një profesionist në përgatitje të kafesë, interiori i ambientit nuk është më i rëndësishëm se shërbimi cilësor i kafesë.

“Trajnime kam bërë me mijëra, si në Kosovë, ashtu edhe jashtë vendit. Tani i mësoj të tjerët që punojnë në këtë fushë dhe janë tejet të mirë. Kjo punë kërkon vazhdimisht përkushtim, sepse gjithmonë del diçka e re. Tani kemi një panair në Milano dhe besoj se do të ketë shumë risi që do t’i shohim”, thotë Spahiu.

Për fund trajneri përgatiti edhe një kafe për ne duke e përcjellë me detaje për një rezultat të mirë në pamje e shije.

“Tani po ju përgatis një kafe. Gjithmonë duhet pastruar uji, sepse ka mbetje nga përgatitja paraprake e kafesë. Më pas pastrohet pjesa ku vendoset kafeja. Kafenë e kemi të freskët, kur bluhet kafeja, duhet shtypur me peshë 15–20 kg që të nxirret vlera e saj. Brenda 3–5 sekondash parashihet të nisë rrjedhja e parë e espressos, në fund, duhet maksimumi 25 sekonda që të arrijmë te espressoja në gjysmë, dhe kështu arrihet përgatitja e kafesë së shijshme dhe cilësore”, thekson Spahiu.