SOT

Nxënësit e fshatrave të Kaçanikut me biletë falas për në shkollë

Almedina Elezi çdo ditë bën të njëjtën rrugë për shkollë, e transporti që e përdor nga fshati Kaçanik i Vjetër për ardhje është falas.

Një gjë e tillë po u mundësohet të gjithë nxënësve të shkollës së mesme profesionale "Feriz Guri dhe Vëllezërit Çaka" në Kaçanik të cilët udhëtojnë nga vendet rurale.

Almedina tani është në vitin e dytë në këtë shkollë dhe është mirënjohëse për mundësinë. Thotë se për familjen shkollimi dhe udhëtimi janë vështirë të përballueshme.

Nxënësja ka në plan që paratë që i kursen nga udhëtimi t’i shpenzojë për gjëra e nevoja të tjera.

Me ligj, komunat janë të obliguara që të paguajnë transportin e nxënësve vetëm në shkollën fillore dhe atë kur është më larg se 4 kilometra.

Drejtori i Arsimit në Komunën e Kaçanikut, Zahir Doda, thotë se vendosën që të paguajnë transportin për nxënësit e fshatrave me qëllim të fuqizimit të shkollave profesionale.

Masa dha efektet e saj, dhe këtë vit sipas tij ka 35 nxënës më shumë në shkollat profesionale.

Mbi 5 mijë euro në muaj para nga buxheti i Komunës shkojnë për transportin e këtyre shkollarëve.

Një iniciativë e tillë kishte qenë edhe më herët në Kaçanik, ku nxënësit që vijonin shkollën profesionale nga fshatrat Strazhë dhe Glloboçicë si dy pikat më të largëta dikur ishin ndihmuar me 50% të shumës së biletës.

Qasja e lehtë në tregun e punës është ndër benefitet që marrin nxënësit, thotë drejtori i shkollës, Atdhe Neziri.

Në Kaçanik, por edhe në komunat e tjera në nivel vendi nxënësit preferojnë më shumë gjimnazet, derisa institucionet vazhdimisht i promovojnë shkollat profesionale si mundësi më e mirë për të gjetur punë.