Sport

Smajlaj kurorëzohet në Beograd mbret i atletikës evropiane

Më në fund shqiptarët e kanë një kampion evropian në atletikë. Është shkodrani Izmir Smajlaj që të shtunën mbrëma fitoi titullin në disiplinën e kërcimit së gjati në evropianin në palestër që përfundoi të dielën në Beograd të Serbisë.

Në një garë dramatike, Smajlaj arriti që në kërcimin e fundit të kalojë 8.08 metra për të fituar medaljen e artë evropiane, shkruan sot “Koha Ditore”. Këtë distancë e kaloi edhe Michel Torneus i Suedisë, por ai kishte kërcim të dytë më të dobët se Smajlaj që kështu u shpall kampion i Evropës.

Smajlaj në finale nisi me kërcim prej 7.81 metra. Distancën prej 8.02 metra e arriti në tentimin e dytë, ndërsa tentimin e tretë e kishte të pasuksesshëm. I katërti ishte i dobët, me 6.58 metra, ndërsa i pesti prapë i dështuar. Kur duhej më së shumti, Smajlaj bëri kërcim të karrierës për rekord kombëtar e personal dhe për medalje të artë evropiane.

Ceremonia e ndarjes së medaljes për Smajlajn dhe dy medalistët e tjerë, është mbajtur të dielën. Ai ka qëndruar krenar derisa flamuri shqiptar është ngritur lart në palestrën në Beograd. Ngritjen e flamurit e ka shoqëruar intonimi i himnit kombëtar.

Është hera e dytë rresht që flamuri shqiptar ngrihet lart në Beograd në nderim të shkodranit 23-vjeçar. Ai para një jave, më 25 shkurt fitoi medaljen e artë në kampionatin ballkanik në palestër. Kështu paralajmëroi garën për titull evropian dhe triumfoi, ndonëse nuk vlerësohej favorit.

Smajlaj, ndonëse në Shqipëri përballet me mungesë kushtesh dhe të përkrahjes, tashmë do të kërkojë edhe titujt e mëdhenj në ambient të hapur. Vlerësohet se ka potencialin e kërkuar për të synuar medalje në botërorë e evropianë... (më gjerësisht lexoni sot në “Koha Ditore”)

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.