Zbulohen sekretet e udhëtimeve të familjes mbretërore

Për turnetë mbretërorë nevojiten muaj të tërë planifikimesh të kujdesshëm, ndërkohë që të gjithë lidhen me vendimet nga ajo se në cilat ngjarje do të shkojë familja mbretërore e deri tek logjistika, siç janë transporti dhe akomodimi. Të gjitha situatat e mundshme merren parasysh, siç janë koha, formalitetet, rëndësia e vetë ngjarjes, ndërsa stafi i pallatit kujdeset për detajet më të vogla. Se sa e rëndësishme është gardëroba e anëtarëve të familjes, e tregon fakti se ekziston i tërë protokolli, ndërsa në pallat ka anëtarë të stafit që kujdesen vetëm për këtë segment të udhëtimit.

Thjesht nuk ndodh që dukesha e Cambridge ose dukesha e Sussexit t’i zgjedhin vetë kombinimet e tyre të veshjeve. Stilistët e tyre e kanë një detyrë të vështirë, sepse ata duhet t’i përgatisin të gjitha veshjet duke marrë parasysh situatat e mundshme të përmendura më lart dhe duhet të marrin në konsideratë gjithashtu se në cilin shtet është familja mbretërore me qëllim që ta respektojnë traditën e tyre përmes stylingut. Edhe për vetë valixhet ekziston një orar rigoroz për të cilin kujdeset përcjellja mbretërore. Ata përzgjedhin dhe e përcaktojnë se cilat valixhe shkojnë në hotel me anëtarët e familjes, cilat përgatiten “për çdo rast” në një adresë tjetër ose në vetë ngjarjet, shkruan KOHA Ditore.

Çdo valixhe i ka dy etiketa, njëra është emri mbretëror i anëtarit të familjes të cilit i përket, si princi Charles, dhe në tjetrën shkruan ku shkon valixhja, për shembull, “nevojitet në avion”. Shenja e kaltër do të thotë që valixhja është e nevojshme në avion, e gjelbra në hotel ndërsa valixhet me një shenjë të verdhë dërgohen në rezidencë, p.sh. Ambasada britanike e vendit që ata e vizitojnë.