Supergrupi i muzikës K-pop, “BTS”, zyrtarisht ka hyrë në një epokë të re, pasi të martën (13 dhjetor) njëri prej anëtarëve të bendit, Jin, e filloi shërbimin e detyrueshëm ushtarak në një qendër trajnimi ushtarak në Korenë e Jugut.
Këngëtari 30-vjeqar do t’i kalojë 18 muaj në uniformë, pas kalimit në bazën e ushtrisë “Yeoncheon” në provincën veriore të Gyeonggi, ku stafi i sigurisë u pushtua nga mediat dhe disa qindra adhurues që ishin mbledhur vetëm për ta parë yllin e muzikës, duke i injoruar lutjet e tij të mëparshme që të mos e bënin një gjë të tillë.
Pankarta të shumta ishin vendosur përgjatë rrugës për ta mirëpritur Jinin dhe rekrutët e tjerë në bazë, e cila gjendet më pak se 16 kilometra nga Zona e Çmilitarizuar që e ndan Korenë e Jugut nga Korea e Veriut.
Shërbimi ushtarak është i detyrueshëm në Korenë Jugore, ku pothuajse të gjithë burrat, nga mosha 28-vjeçare e tutje, duhet të shërbejnë në ushtri për 18 muaj.
Parlamenti i këtij shteti e miratoi një projekt-ligj në vitin 2020, që i lejon yjet e muzikës K-pop, domethënë ata që shkëlqejnë në kulturën dhe artin popullor, që ta shtyjnë shërbimin e tyre deri në moshën 30-vjeçare.
Shërbimi i Jinit do të fillojë me një kurs trajnimi bazë pesë-javor përpara se të caktohet në një njësi, bazuar në praktikën standarde.
Edhe
“BTS” po rikthehet me album dhe turne botëror
Në muajin tetor, kompania diskografike e “BTS” bëri të ditur se shtatë anëtarët e grupit po planifikonin të kryenin shërbimin ushtarak.
Pak muaj më parë, bendi shumë i dashur nga publiku anembanë botës i informoi fansat se do të pauzojnë përkohësisht nga muzika, dhe se shtatë anëtarët e tij do të fokusohen në krijimin e karrierës si solo artistë. Ata pritet të rikthehen si “BTS” diku rreth vitit 2025.
