Vjollca Robelli Mripa, këngëtarja e cila njihet me emrin skenik AJO, do të interpretojë në një prej skenave të sallës prestigjioze koncertale, “Royal Albert Hall”, në Londër. Lajmin e ka bërë të ditur vet këngëtarja, përmes një postimi në rrjetet sociale.
“E lumtur t’ju njoftoj se me datën 3 dhjetor nga ora 9:30pm, nën organizim nga “Arts Canteen” do të performoj në njërën nga skenat më të njohura dhe më prestigjioze në botë, ‘Royal Albert Hall’. Një nga ëndrrat e mija më të mëdha sa i përket karrierës po realizohet vetëm tri javë para ditëlindjes sime të 40-të… le të guxojmë të ëndërrojmë”, kishte shkruar Robelli.
Tutje ajo ka bërë të ditur se në “Royal Albert Hall” do të këndojë shqip, performancë kjo të cilën e merr me përgjegjësi të madhe drejt promovimit të kulturës dhe muzikës shqipe, në një nga hapësirat ku kualiteti i muzikës është në nivelin më të lartë botëror, si dhe i ka bërë thirrje të gjithë të interesuarve që të shkojnë dhe ta ndjekin këtë koncert.
AJO është kantautore me bazë në Londër. Si shqiptare nga Kosova, rrënjët e saj janë ngulitur thellë në muzikën dhe performancat e saj. Ajo merr frymëzim nga trashëgimia e saj shqiptare, duke e ngritur zanatin dhe emocionin e muzikës tradicionale popullore në një territor inovativ, të futur në xhaz.
Në vitin 2002, AJO për herë të parë u paraqit në Kosovë dhe Shqipëri me lansimin e këngës “Ajo” nën emrin e saj të vërtetë Vjollca Robelli. Kënga i ishte dedikuar ndërgjegjësimit ndaj pandemisë së AIDS, e cila kryesoi toplistat në shumë TV dhe radiostacione, u rendit e dyta në rajonalen “BBC Top of the Pops”, fitoi “Video Best Rock” në “VideoFest” dhe Vjollca u emërua si ambasadore e muzikës rinore po atë vit.
Edhe
AJO me “Gërshetat” në rrëfime jazzi vallëzon me perlat shqipe
Shtatëmbëdhjetë vjet më vonë, kënga ruan popullaritetin e saj, gjë që bëri që Vjollca të adoptojë emrin skenik AJO.
Vjollca u transferua në Londër në 2004 për të studiuar vokalin, muzikën dhe menaxhimin e mediave.
Në vitin 2019, AJO erdhi në Kosovë për ta organizuar koncertin i cili promovoi EP albumin “BESA”, që e riktheu në skenën muzikore. Koncerti i cili zuri vend në “Kino Armata” u transmetua në versionin televiziv ekskluzivisht për shikuesit e Kohavisionit.
