Megan Thee Stallion shtrihet në spital pas një shfaqjeje teatrale

Reperja e njohur Megan Thee Stallion është shtruar në spital në New York pasi u ndie keq gjatë shfaqjes teatrale “Moulin Rouge! The Musical”, duke u detyruar ta ndërpresë performancën në mes.

Sipas përfaqësuesit të saj, Didier Morais, gjendja e saj shëndetësore u përkeqësua papritur gjatë shfaqjes të martën mbrëma.

“Gjatë shfaqjes të së martës, Megan filloi të ndihej shumë keq dhe u transportua menjëherë në një spital lokal, ku simptomat e saj po vlerësohen aktualisht. Do të ndajmë informacione të tjera sapo të kemi më shumë detaje”, ka deklaruar ai për “The Hollywood Reporter”.

Lajmi u konfirmua edhe nga miku i saj i afërt dhe stilisti i flokëve, Kellon Deryck, i cili publikoi një postim në rrjetin social X.

Shfaqja kishte nisur normalisht, me The Stallion në skenë në hapje. Por më pas performanca u ndërpre, ndërsa stafi i teatrit u kërkoi spektatorëve të qëndronin të ulur. Artistja u largua nga skena dhe, sipas raportimeve, u zëvendësua nga një performuese tjetër për pjesën e mbetur të shfaqjes.

Vetëm një javë më parë, The Stallion kishte debutuar në Brodaway, në teatrin Al Hirschfeld Theatre, në rolin e Zidlerit. Ky ishte jo vetëm debutimi i saj i parë në teatër, por edhe hera e parë që ky rol interpretohet nga një grua.

Në këtë rol, ajo kishte marrë vëmendje të madhe, me emra të njohur si Queen Latifah dhe Tiffany Haddish mes publikut. Në shfaqje, The Stallion performonte edhe hitet e saj të njohura si Savage dhe Body.

Më herët, roli i Zidlerit është luajtur nga emra të njohur si Boy George, Wayne Brady, Tituss Burgess dhe Bob the Drag Queen. Roli u interpretua fillimisht nga aktori i njohur i Broadwayt, Danny Burstein, i cili fitoi edhe çmimin Tony për këtë performancë.

“Gjithmonë kam besuar në sfidimin e vetes në mënyrë kreative. Teatri është një mundësi e re që jam shumë e emocionuar ta përqafoj”, ka thënë The Stallion.