G-Eazy ka ndarë detaje rreth albumit të tij të ri të titulluar “Everything’s Strange Here”.
Albumi i cili vjen pas atij të vitit 2017, “The Beautiful & Damned”, do të lansohet më 5 qershor dhe nëse kënga e re e reperit “Free Porn, Cheap Drugs” është indikacion i përmbajtjes së albumit të ardhshëm, atëherë ai do ta sjellë reperin 31-vjeçar, G-Eazy, më shumë duke kënduar sesa duke bërë rep.
Duke e ndarë me fansat në Instagram punën artistike të realizuar për albumin, “Everything’s Strange Here”, G-Eazy kishte shkruar: “Para tetë javësh nuk e dija se kisha nevojë ta realizoja këtë incizim. Bota është kthyer përmbys nga të gjitha anët, por shumë prej nesh e kanë pasur rastin të reflektojnë për veten dhe të evoluojnë. Ky projekt e përfaqëson zemrën dhe mendjen time në këto kohët e fundit. Albumi është i sinqertë dhe i pastër… Juve ju mbetet ta gjykoni nëse ju pëlqen ose jo. Kështu ndihem unë.”
Ndër të tjera, G-Eazy e zbuloi se vazhdimi i albumit të vitit 2014, “These Things Happen”, është gjithashtu në realizim e sipër dhe së shpejti do të lansohet për fansat e tij anembanë botës, transmeton Koha.
Përveç solo projekteve shumë të suksesshme, G-Eazy, gjithashtu njihet si një prej artistëve më të kërkuar për bashkëpunime. Ndër vite ai ka punuar me yje të njohur të muzikës të tillë si: Chris Brown, Kehlani, Halsey, Bebe Rexha, Tyga dhe të tjerë.