-
Përktheu:
Vita Abrashi-Kajtazi
- 16 korrik 2025 14:16
- Shpërndaje në:
Aktorja e famshme, Cameron Diaz, do të jetë pjesë e kastit të aktorëve të filmit të ri të zhanrit komedi/aksion të platformës transmetuese Netflix, i cili do të quhet “Bad Day”, ka raportuar The Hollywood Reporter.
Regjinë e këtij filmi do ta bëj regjisori i projektit filmik “Jury Duty”, Jake Szymanski.
Diaz, e cila pas shumë viteve u rikthye në ekranin e madh këtë vit, me një film po ashtu të Netflixit, “Back in Action” po vazhdon të marrë role të reja.
Aktorja është bashkuar me gjigandin e transmetimeve për të luajtur “Bad Day”, producent i të cilit do të jetë Beau Bauman.
Skenari është shkruar nga Laura Solon dhe paraqet një nënë vetushqyese që lufton ta mbajë një premtim të vogël që i ka bërë të bijës në ditën më të keqe të jetës së saj.
Projekti është përshkruar si versioni komik i “Falling Down”, dramë e vitit 1993 regjinë e së cilës e ka bërë Joel Schumacher, në të cilën luante aktori i njohur Michael Douglas.
Solon do të jetë edhe producente ekzekutive, ashtu si edhe Mark Moran. Ky është bashkëpunimi i tretë mes Solon dhe Bauman, të cilët më parë kanë punuar bashkë në komeditë “Office Christmas Party” dhe “Let It Snow”. Skenaristja e ka shkruar skenarin në mënyrë të pavarur, ndërsa Bauman ka ndihmuar në zhvillimin e tij.
Netflix po lëviz shpejt me këtë projekt, i cili pritet të xhirohet këtë vjeshtë në New York dhe New Jersey.
Me filma që variojnë nga “Something About Mary” dhe “The Holiday”, e deri tek “Bad Teacher” dhe filmat “Shrek”, Diaz ishte një nga yjet më të suksesshme të kinemasë në Hollywood kur vendosi të tërhiqej në vitin 2014. Ajo u rikthye falë drejtuesve të mëparshëm të Netflix, të cilët e bindën me një pagesë të majme dhe mundësinë për t’u ribashkuar me kolegun e saj, aktorin Jamie Foxx, për projektin “Back in Action”.
Filmi, që flet për një çift të martuar që dikur kanë qenë spiunë, debutoi në muajin janar dhe u bë menjëherë hit në platformë. Vetëm gjashtë muaj pas publikimit, ndodhet në vendin e gjashtë në listën e filmave më të shikuar të të gjitha kohërave në Netflix, sipas Nielsen.
“Back in Action” është gjithashtu filmi origjinal më i shikuar i këtij viti, me 5.26 miliardë minuta të shikuara, dhe i treti më i shikuar në të gjitha platformat e transmetimit.
Traileri i filmit "Back In Action":
