Reperi legjendar, Tupac Shakur, u nderua postmortum me yll në shtegun e famës në Hollywood, vetëm disa ditë para ditëlindjes së tij.

Motra e reperit, Sekyiwa “Set” Shakur, ishte ajo e cila e pranoi këtë nderim në emër të vëllait të saj të ndjerë, në ceremoninë e që u drejtua nga prezantuesi i njohur i radios, Big Boy. Gjatë fjalimit të saj, ajo u përlot ndërsa e përshkroi vizionin e vëllait të saj të madh për t’u nderuar një ditë me yll në Hollywood.

“Që nga hera e parë që shkeli në këtë skenë të Teatrit Apollo në moshën 13-vjeçare, para se dikush t'ia njihte emrin, ai e dinte se ëndrra e tij ishte të bëhet me yll këtu në bulevardin e famës”, deklaroi ajo para të pranishmëve. “Sot nuk po e festojmë vetëm një yll të vendosur në tokë, por po e nderojmë punën dhe pasionin që ai ka investuar për të realizuar ëndrrat e tij. Ylli i tij qiellor do të shkëlqejë pak më shumë sot. Dhe përsëri, ai na ka bërë të gjithëve jashtëzakonisht krenarë. Të duam, Tupac”.

Organizata e cila i përzgjedh personalitetet që do të nderohen me yll, njoftoi se qysh në vitin 2013 ishte vendosur që ylli me emrin e reperit të vendosej në këtë bulevard, por kishin pritur që familja e tij ta caktonte një datë më domethënëse dhe të përshtatshme për ta.

Ndonëse i lindur në New York dhe i rritur në Baltimore dhe në Gjirin Lindor, Tupac u bë sinonim i muzikës së Los Anxhelosit dhe hip-hopit të Bregut Perëndimor. Ai gjithashtu pati një karrierë në zhvillim në fushën e filmit - me role në projekte të tilla si “Poetic Justice” dhe “Above the Rim”- por fatkeqësisht jeta e tij u ndërpre para kohe si pasojë e lëndimeve nga të shtënat me armë zjarri. Ngjarja ndodhi në vitin 1996 ku ai ishte vetëm 25-vjeçar.

Megjithëkëtë, ylli i sapozbuluar në Hollywood, e nderon punën e tij në fushën e muzikës.

Ceremonia e cila zuri vend në Los Angeles u ndoq edhe nga reperi YG dhe anëtarët e grupit “Outlawz”. Allen Hughes dhe Jamal Joseph, regjisori dhe producenti i dokumentarit, “Dear Mama: The Saga of Afeni and Tupac Shakur”, po ashtu qenë të pranishëm në këtë ngjarje.