Ylli i muzikës dhe filmit, Selena Gomez, po i lut fansat e saj që të ndalojnë së dërguari Hailey Bieberit kërcënime me vdekje, kjo pasi modelja dhe afaristja e famshme i ka kërkuar ndihmë në lidhje me sulmet e urrejtjes që ata po ia bëjnë online, tash e sa vjet.
“Hailey Bieber më ka kontaktuar dhe më ka informuar se vazhdimisht merr kërcënime me vdekje dhe komente negative nga fansat e mi. Unë nuk i miratoj këto sjellje dhe askush nuk meriton të përjetojë kaq shumë urrejtje dhe bullizëm. Unë gjithmonë kam avokuar për mirësjellje dhe vërtet dua që këto veprime dhe sjellje të ndalojnë”, shkroi Gomez në postimin e fundit në Instagram Story.
Hailey Bieber, e cila është e martuar me ish të dashurin e Selenas, Justin Bieber, është bombarduar me mesazhe urrejtjeje në internet që nga mosmarrëveshja e krijuar si pasojë e një postimi në TikTok, ku ajo duket sikur po e nënçmon këngëtaren e famshme. Ajo i ka mohuar akuzat e njerëzve, duke thënë se ka vetëm dashuri dhe respekt për Gomezin.
Selena, e cila iu nënshtrua transplantimit të veshkës në vitin 2017, pasi u diagnostikua me sëmundjen lupus, u bë e famshme si fëmijë duke luajtur në serialin televiziv “Barney and Friends”. Edhe pse nuk dëshiron të jetë shumë e famshme, Gomez është e vendosur ta shfrytëzojë platformën për të shpërndarë pozitivitet nëpër botë.
Deri më sot, këngëtarja 30-vjeçare i ka shitur më shumë se 210 milion këngë anembanë botës dhe muzika e saj është transmetuar mbi 45 miliardë herë. Vjetëve të fundit po ashtu i është dedikuar aktrimit, duke luajtur krahas komedianëve, Steve Martin dhe Martin Short, në serialin e vlerësuar lartë nga kritikët, “Only Murders In The Building”.
