Aktorja e cila u bë e famshme qysh në fëmijëri, Abigail Breslin, është martuar me të dashurin e saj prej vjetësh, Ira Kunyansky.
Ylli i filmit “Little Miss Sunshine” e ka konfirmuar lajmin e lumtur duke e postuar në Instagram një fotografi të unazës së martesës, me ç’rast i informoi ndjekësit se është kurorëzuar me Kunyanskyn pothuajse një vit pasi çifti e bëri publik lajmin e fejesës.
Në postimin e saj, Abigail shkroi: “Vajza juaj është martuar”. Derisa Kunyansky e postoi një fotografi nga dita e madhe e çiftit, ku aktorja shfaqej me fustanin e nusërisë ndërsa dhëndri shihet duke qëndruar pas saj, me një buzëqeshje të madhe në fytyrë.
“E dua shumë gjysmën time të shpirtit”, shkruhej në mesazhin shoqërues të postimit.
Abigail dhe Ira janë në lidhje nga viti 2017. Për disa vjet kanë zgjedhur që të qëndrojnë larg vëmendjes së mediave dhe publikut, duke e ruajtur në maksimum privatësinë e tyre.
Lajmi i martesës vjen disa muaj pasi aktorja 26-vjeçare foli publikisht për një lidhje të kaluar, ku ajo kishte përjetuar dhunë familjare. Me rastin e Muajit të Ndërgjegjësimit për Dhunën në Familje, Breslin shpjegoi se ishte në një lidhje abuzive për dy vjet, dhe kjo përvojë e kishte bërë të ndihet sikur e meriton keqtrajtimin.
Ish i dashuri më rrihte rregullisht, më mbyllte në dhoma dhe më detyronte të pretendoja se gjithçka ishte në rregull dhe normale, ndërsa përballesha me lëndime intensive. Lëndime që shumica e njerëzve as që i shihnin. Unë përdorja korrektor dhe fondatinë për t’i fshehur të gjitha mavijosjet, sepse në një farë mënyre, unë ende kisha ndjenja për këtë person. Lëndimet fizike shoqëroheshin gjithashtu nga një bollëk përuljesh, ofendimesh dhe abuzimesh verbale të ashpra, që më bënin të ndihesha kaq e padenjë për të më dashuruar dikush. Ndihesha e shëmtuar dhe e urryer dhe më dukej sikur meritoja shumë pak në jetë. Isha i sigurt se kishte diçka në thelb që nuk shkonte me mua”, deklaroi aktorja.
Megjithëse e re në moshë, Abigail Breslin, shquhet për role në filma të mëdhenj të Hollywoodit si: “Zombieland”, “My Sister’s Keeper”, “Nim’s Island”, “Stillwater”, “Maggie”, “Ender’s Game”, “The Ultimate Gift” dhe të tjerë.
© KOHA. Të gjitha të drejtat janë të rezervuara.
