Rihanna pritet ta shënojë rikthimin në muzikë këtë javë
Foto: AP/Associated Press
Studioja “Marvel” e ka postuar një klip të shkurtër përmes së cilit paralajmëron se Rihanna do të lansojë muzikë të re këtë javë.
Në klipin në fjalë, shkronja “R” veçohet në fjalinë “Forever” dhe më pas shfaqet data 28 tetor 2022. Ndërsa postimi shoqërohet me mbishkrimin “#WakandaForever”, shkruan portali “Female”.
— Black Panther: Wakanda Forever (@theblackpanther) October 26, 2022
Klipi ngacmues vjen një javë pas shpërthimit të spekulimeve në mediat online rreth përfshirjes së Rihannas në këtë projekt filmik, me realizimin e dy këngëve të reja.
Për më shumë, gazetari i së përditshmes “New York Times”, Kyle Buchanan, deklaroi se një prej këtyre këngëve do të shërbejë si kolonë zanore e filmit.
“Thashethemet po qarkullojnë dhe unë kam dëgjuar prej javësh që, Rihanna, është duke e incizuar kolonën zanore të filmit ‘Black Panther: Wakanda Forever’. Mënyra më e mirë për ta tejkaluar suksesin e këngës së filmit të kaluar “All the Stars”, është duke e angazhuar e përfshirë këngën e parë të Rihannas në këto vjetët e fundit”.
Kendrick Lamar dhe SZA, ishin bërë bashkë për realizimin e kolonës zanore të filmit të parë, “Black Panther”, me titull “All the Stars”.
Filmi i shumëpritur nga publiku, “Black Panther: Wakanda Forever”, do ta shënojë premierën botërore të mërkurën (26 tetor) në Hollywood. Ndërsa, nëpër kinematë e Shteteve të Bashkuara pritet të publikohet më datë 11 nëntor.
Albumi i tetë i Rihannas i incizuar në studio, “Anti”, doli në treg në vitin 2016 dhe nga atëherë, ylli i hitit “Diamond” i ka ngacmuar fansat me publikimin e materialeve të reja muzikore.
Megjithëse ende nuk është konfirmuar ndonjë datë e lansimit të albumit të ri të këngëtares 34-vjeçare, adhuruesit do të kenë mundësi ta shijojnë performancën e saj në kampionatin e futbollit amerikan, “Super Bowl”.
Në një intervistë të fundit, Riri tha se po ndihet nervoze por edhe shumë e emocionuar për këtë shou. Ngjarja më e ndjekur në Amerikë mbahet më 12 shkurt 2023, në stadiumin “State Farm” të Arizonas. Ky do të jetë viti i parë ku “Apple Music” shërben si sponsor i koncertit madhështor, në vend të partnerit të kamotshëm të NFL-it, “Pepsi”.
