Një grua e cila është dëshmitarja kryesore në procesin e dytë gjyqësor federal ndaj R. Kelly ka dëshmuar se këngëtari i R&B ka kryer marrëdhënie seksuale me të "qindra herë" para se ajo të mbushte 18 vjeç.
Gruaja tash 37-vjeçare, e njohur si "Jane", tha se kontaktet e pahijshme me Kellyn filluan kur ajo ishte vetëm 13 vjeç, raportoi BBC të premten.
Këngëtari është vënë sërish para gjykatës në Çikago për pornografi me fëmijë, pengim të drejtësisë dhe akuza të tjera.
Avokatët e tij kanë këmbëngulur se ai nuk është "një përbindësh" dhe meriton një gjykim të drejtë.
Kelly, emri i plotë i të cilit është Robert Sylvester Kelly, po përballet me 13 akuza penale duke përfshirë krijimin e pornografisë së fëmijëve, pengimin e drejtësisë dhe joshjen e të miturve në aktivitet seksual.
Ai tashmë po vuan një dënim me 30 vjet burgim pasi u dënua për trafik seksual dhe shantazh në një gjyq të veçantë të mbajtur në New York vitin e kaluar.
Çështja aktuale mbështetet në masë të madhe në dëshminë e "Jane", një prej akuzueseve të tij.
Prokurorët pretendojnë se Kelly bëri të paktën katër video me Jane, pjesë të të cilave do t'u tregohen juristëve.
Të enjten në gjykatë, Jane dëshmoi se Kelly kishte marrëdhënie seksuale me të, duke filluar që kur ishte 15 vjeç. Jurive iu shfaqën fotografitë e saj në shkollë të mesme për të ilustruar se sa e re dukej në atë kohë.
Gjatë dëshmisë së saj dy-orëshe, Jane përshkroi një numër takimesh seksuale që Kelly dyshohet se regjistroi. Në një video, Kelly u shfaq duke i dorëzuar asaj para.
Në këtë proces akuzohen edhe dy nga ish-punonjësit e Kelly-t. Derrel McDavid, ish-menaxheri i tij i biznesit, akuzohet se ka ndihmuar Kelly-n të rregullojë gjyqin e vitit 2008 dhe Milton Broën është akuzuar për marrjen e pornografisë së fëmijëve.
Të dy burrat janë deklaruar të pafajshëm.
© KOHA. Të gjitha të drejtat janë të rezervuara.
