Ishte një atmosferë familjare për Idris Elban, në premierën botërore të trilerit të tij të ri, “Beast”, në New York City.
Aktori i njohur britanik u shoqërua në këtë ngjarje nga vajza e tij 20-vjeçare, Isan, raporton agjencia e lajmeve “AP”. Për Elban, angazhimin në rolin e një babai i cili do të bënte gjithçka për t’i mbrojtur fëmijët e tij, ishte një vendim goxha personal dhe i veçantë.
“Kur e lexova skenarin, e pash që fliste për një baba dhe dy vajzat e tij derisa ai mundohet të bëjë gjithçka për të mirën e tyre. Kjo më preku thellë në zemër dhe thash me vete, duhet patjetër ta luaj këtë rol. Sepse ishte shumë personal për mua si prind”, deklaroi aktori para gazetarëve në premierë.
Në filmin e titullua, “Beast”, Elba e portretizon një burrë i cili sapo e ka humbur gruan. Ai vendos të kthehet në Afrikën Jugore, ku e takuar gruan e tij për herë të parë, por kësaj radhe i shoqëruar nga dy vajzat e tyre. Por, ajo që fillon si një vizitë e qetë dhe nostalgjike, shndërrohet në një makth kur e gjejnë veten të përndjekur nga një luan i cili ka dalë nga kontrolli.
I pranishëm mbi qilim të kuq ishte edhe aktori nga Afrika Jugore, Sharlto Copley, i cili në film e luan rolin e Martinit, menaxheri i parkut ku ruhen kafshët e egra.
“Unë jam rritur në Afrikën Jugore, prandaj sigurisht se jam përballur shumë më shumë me kafshët e egra, sesa pjesa tjetër e aktorëve. Dhe vazhdimisht i ngacmoja dy aktoret e reja në film, sepse ato frikësoheshin edhe nga insektet më të vogla. Por, eksperiencat e mia më shërbyen vërtetë në film, sepse e portretizoja xhaxhain i cili i mëson këto vajza për jetën në Afrikë. Para kamerave i mësoja ato për luanët kurse prapa kamerave, ua tregoja ndonjë insekt të parrezikshëm”.
Por, pavarësisht frikës së tyre ndaj insekteve, aktoret Iyana Halley dhe Leah Sava Jeffries, treguan se janë kënaqur shumë gjatë realizimit të këtij filmi.
“Xhrimet në Afrikën Jugore dhe fakti se po aktroja krahas Idris Elbas dhe motrës sime Iyana, ishte gjithçka për mua. Më ka pëlqyer shumë kjo përvojë”, tha Sava Jeffries.
Kurse Halley deklaroi: “Ne po aktronim dhe siguroheshim që gjithçka të dukej sa më autentike, por edhe argëtoheshim secilën herë që xhironim, duke bërë shaka në veturë, duke bërë rep dhe duke vallëzuar. Jemi argëtuar jashtë mase për tre muaj. Ishte një prej eksperiencave më të bukura të jetës sime”.
I realizuar me regji të Baltasar Kormákurit, “Beast” lansohet nëpër kinematë e Amerikës më 19 gusht.
