Gjatë kësaj vere, kinematë anembanë globit do të jenë nikoqire të një prej filmave më kaotik dhe qesharak të të gjitha kohërave. Fjala është për projektin e radhës së animuar, “Minions: The Rise of Gru”.
Filmi i ri e rrëfen historinë e personazhit tashmë të njohur nga publiku mbarë botëror, Gru, që kësaj radhe vjen si një djalosh 12-vjeçar i cili ka filluar të bëjë plane për ta pushtuar botën. Edhe pse ka ide të mëdha, gjërat nuk shkojnë edhe aq mirë për të, prandaj kur i takon disa personazhe të njohura si Minions, ata vendosin t’i bashkojnë forcat për t’i realizuar misionet e tyre.
Zërat për personazhet e këtij projekti të animuar i huazojnë disa aktorë të famshëm, si Steve Carell, Russell Brand, Michelle Yeoh, Julie Andrews, Taraji P. Henson, Jean-Claude Van Damme, Lucy Lawless dhe të tjerë.
Me një kastë të fuqishme aktorësh dhe skena të shumta qesharake, filmi i realizuar nga studiot “Illumination Animation” dhe “Universal Pictures” pritet të shënojë suksese të kënaqshme në arkat filmike botërore.
“Minions: The Rise of Gru” lansohet nëpër kinematë botërore nga 1 korriku.
