Johnny Depp befason fansat në koncertin e Jeff Beckut
Aktori i njohur hollywoodian, Johnny Depp, të dielën mbrëma e bëri një paraqitje befasuese në koncertin e rok-kitaristit, Jeff Beck, në Sheffield.
Ylli 58-vjeçar i kinematografisë, aktualisht është duke e pritur vendimin e gjykatës në rastin gjyqësor të iniciuar nga ai, me ç’rast po e paditë ish-gruan, Amber Heard, për shpifje dhe prishte të imazhit. Megjithëkëtë, ai duket se ka vendosur që të udhëtojë drejt Britanisë së Madhe vetëm për të performuar krahas mikut të tij muzikant, raportoi të hënën portali “Female”.
Dyshja e famshme e interpretoi coverin e hitit të John Lennonit, “Isolation”, si dhe disa këngë të artistëve tjerë ikonik, si Marvin Gaye dhe Jimi Hendrix. Ndërkaq, video të shkurtra të shkëputura nga koncerti, ku Depp shfaqet në formë dhe disponim mjaft të mirë, i pushtuan rrjetet sociale të dielën mbrëma (29 maj).
Ish-ylli i bendit “Yardbirds”, Jeff Beck, do t’i mbajë edhe dy koncerte në sallën “Royal Albert Hall” në Londër, dhe besohet që aktori i njohur i Hollywoodit do ta shoqërojë atë në këtë skenë.
Johnny Depp po e padit Amber Heardin me 50 milionë dollarë për shpifje dhe dëmtim të karrierës, pas artikullit të cilin ajo e kishte shkruar në vitin 2018 për gazetën, “The Washington Post”, ku ajo i referohej vetes si personazh publik që përfaqëson abuzimin në familje. Edhe pse Heard nuk e kishte përmendur emrin e tij asnjëherë, avokatët e aktorit thonë se ishte e qartë që ajo po i referohej Deppit dhe kjo ka bërë që ai të përballet me vështirësi për të fituar role filmike në Hollywood.
Aktorja e filmit “Aquaman” e ka akuzuar Deppin për sulm fizik dhe seksual në disa raste, para dhe gjatë martesës së tyre të shkurtër, ngjarje këto që shpesh kishin ndodhur gjatë kohës sa aktori ishte nën ndikimin e alkoolit. Ky i fundit thotë se akuzat e Heardit për abuzim me substance janë të ekzagjeruar dhe se ai kurrë nuk e kishte humbur kontrollin gjatë asaj periudhe.
Heard po ashtu po e kundërpaditë Deppin për 100 milionë dollarë, duke e akuzuar atë për orkestrimin e një “fushate shpifjeje” kundër saj dhe duke e përshkruar padinë e tij si një vazhdimësi të abuzimit dhe ngacmimit.
Ndërkaq, gjatë argumentit përmbyllës në gjykatë, Depp e luti jurinë që të vendosë në favor të tij dhe t’ia rikthejë jetën. Avokatja e aktorit, Camille Vasquez, tha se faktet e dorëzuara në gjykatë vërtetojnë se 36-vjeçarja, Heard, ishte abuzuesja e vërtetë në lidhjen e çiftit.
