Grupi i njohur i muzikës K-Pop, “BTS” do ta mbajë koncertin e parë në Korenë Jugore në dy vjetët e fundit.
Koncerti do të jetë pjesë e turneut të tyre, “Permission to Dance On Stage”, i cili fillon muajin e ardhshëm.
Në një deklaratë për media të lëshuar në mëngjesin e sotëm, kompania muzikore “Big Hit Music” e bëri të ditur lajmin se bendi i përbërë nga shtatë djelmosha, do të performojë në stadiumin “Jamsil Olympic” më 10, 12 dhe 13 mars. Koncertet e ardhshme e shënojnë takimin e parë live të anëtarëve të “BTS” me fansat e tyre, pas dy vjet e gjysmë. Për herë të fundit ata kishin performuar në praninë e adhuruesve në Korenë Jugore, në tetor të vitit 2018 në kuadër të turneut botëror, “Love Yourself: Speak Yourself (The Final)”.
Sigurisht performancat e datës 10 dhe 13 të muajit të ardhshëm do të transmetohen edhe online, kurse koncerti i 12 marsit do të jenë në diospozicionin e publikut për t’u shikuar drejtpërdrejtë, nëpër kinematë anembanë botës.
Vitin e kaluar, “BTS” e shënoi rikthimin tek performancat live me koncertet e mbajtura në Los Angeles të Kalifornisë. Grupi i njohur i mbajti disa shou në stadiumin “SoFi”, më 27 nëntor, 1 dhe 2 dhjetor.
Performancat e tyre në L.A. u shndërruan në organizimet më të mëdha muzikore në vend, në pothuajse një dekadë. Sipas revistës “Billboard”, për këto koncerte u shitën 214 mijë bileta dhe grupi koreano-jugorë i fitoi gjithsej 33.3 milionë dollar.
© KOHA. Të gjitha të drejtat janë të rezervuara.
