Mandy Moore nga publiku kryesisht njihet si aktore e shumë filmave romantikë përfshirë këtu edhe serialin hit, “This Is Us”. Por, ajo e gëzon edhe një karrierë të suksesshme muzikore.
Së fundmi përmes rrjeteve sociale, Moore e ka bërë të ditur lajmin se shumë shpejtë do të sjell muzikë të re për fansat e saj.
Në vitin 2020, këngëtarja, tekstshkruesja dhe aktorja e famshme amerikane e lansoi albumin e parë në 11 vjetët e fundit, “Silver Landings”, dhe përmes një postimi të fundit në Instagram ajo reflektoi mbi këtë incizim si dhe e konfirmoi se tashmë është duke punuar në realizimin e disa këngëve të reja.
“Para gati 2 vjetësh u lansua albumi im i parë në 11 vjetët e fundit. Na kishin mbetur vetëm katër ditë para se ta filloja turneun tim të parë të organizuar nga viti 2007, kur pandemia e mbylli gjithë botën. Ishte e vështirë të kaloje nëpër një mori emocionesh kur e mendojë sa shumë kishte punuar për t’i realizuar gjithë ato këngë, pastaj të ballafaqoheshe me zhgënjimin dhe pikëllimin e ëndrrave të parealizuara, të gjitha këto ndërsa kolektivisht po luftonim me tragjedinë që e kishte kapluar mbarë botën. Kështu që vendosa t’i kthehesha muzikës sepse ishte i vetmi ngushëllim që e gjeja teksa qëndroja e ngujuar në shtëpi. Gjatë një periudhe shumë të pasigurt, unë bashkë me bashkëshortin tim Taylor Goldsmith dhe muzikantin e producentin, Mike Viola, e filluam punën rreth realizimit të një albumi të ri muzikor i cili njëkohësisht e përfaqësonte kapitullin më të bukur të jetës sime, teksa po prisja të bëhesha nënë për herë të parë. Sidoqoftë, qëllimi i këtij mesazhi është t’iu tregojë se së shpejti vjen një album i ri nga unë dhe një turne muzikor gjithashtu. Po qëndroj e përgatitur dhe e hapur ndaj kësaj eksperience duke pritur të që gjërat të zhvillohen ashtu siç duhet. Komentet, dashuria dhe inkurajimi juaj vlerësohen shumë. Faleminderit miq!! Shpresoj të shihemi së shpejti në koncerte”, shkruhej në mesazhin e këngëtares.
Rikthimi i Mandyt në muzikë në vitin 2019 me lansimin e këngës, “When I Wasn’t Watching”, erdhi një muaj pasi një hulumtim në gazetën “New York Times” raportoi se ish-bashkëshorti i saj, Ryan Adams, ia kishte pezulluar karrierën muzikore për disa vjet. Artikulli i botuar në shkurt të atij viti raportonte se, Adams kishte sjellje manipuluese dhe njëkohësisht i ndiqte artistet femra për seks duke i shfrytëzuar ato dhe më pas duke ua mbytur të gjitha ambiciet në karrierë. Ai kishte vepruar njësoj edhe me këngëtaren Moore, të cilën e kishte bindur të mos bashkëpunoj me producentë dhe menaxherë të tjerë, çka edhe bëri që ai të ishte përgjegjës për karrierën e saj muzikore.
“Parimisht, sjellja e tij kontrolluese i bllokoi aftësitë e mia për të krijuar lidhje të reja në industri, gjatë një kohe shumë të rëndësishme dhe potencialisht fitimprurëse të karrierës sime”, kishte deklaruar Moore për “New York Tomes”.
Shkurorëzimi i saj nga Ryan Adams u finalizua në vitin 2016. Në një tjetër intervistë ajo e kishte përshkruar këtë martesë si të paqëndrueshme me dinamika krejtësisht të pashëndosha. Moore po ashtu deklaroi se në atë kohë ndihej shumë e pikëlluar dhe e vetmuar.
