Ylli i kinematografisë, Bradley Cooper, e kujtoi një moment të jashtëzakonshëm kur ishte kërcënuar me thikë nga një burrë. Ngjarja e frikshme kishte ndodhur në New York.
Aktori i famshëm hollywoodian po e merrte vajzën e tij nga shkolla pak para se të fillonte pandemia, kur ky incident kishte ndodhur.
“E kisha zakon të ecja nëpër rrugët e New Yorkut me kufje në vesh, dhe pak para se të shpërthente pandemia isha në metro rrugës për ta marrë vajzën time Lea nga shkolla, kur u sulmova nga një burrë i cili më kërcënoi me thikë. Ishte një eksperiencë e çmendur dhe në atë moment e kuptova se isha rehatuar më shumë se që duhej nëpër rrugët e qytetit. Dhe kisha harruar të ruhem nga krimet që fatkeqësisht janë të zakonshme në këtë vend”, ka deklaruar Cooper gjatë një interviste me aktorin Dax Shepherd për podcastin e tij “Armchair Expert”.
Tutje Cooper tregoi se e kishte vënë re që dikush po i vinte prapa por kishte menduar se është vetëm një fans i cili po i afrohej për t’i kërkuar ta bëjë një fotografi me të, deri në momentin kur e pa që burri në fjalë e nxori një thikë nga xhepi i tij.
Aktori e përshkroi sulmuesin e tij si një person shumë i ri në moshë. Ai kishte arritur t’i shpëtojë sulmit duke vrapuar dhe duke u fshehur në një qoshe, derisa personi në fjalë ishte larguar me vrap nga vendi i ngjarjes. Për fat të mirë, Cooper, kishte arritur t’i shkrepë disa fotografi të kërcënuesit me telefonin e tij, të cilat më pas ia kishte dorëzuar policisë.
Një prej projekteve të ardhshme të Bradley Cooperit është filmi i regjisorit Paul Thomas Anderson, “Licorice Pizza”. Gjatë muajit nëntor u lansuan kolonat zanore të filmit, ku përfshihet një këngë origjinale e kompozuar nga Jonny Greenwood. Në këtë projekt kinematografik gjithashtu përfshihen këngët, “‘Life On Mars?” nga David Bowie, “Let Me Roll It” nga Paul McCarteny dhe Wings, “Peace Frog” nga grupi “The Doors” dhe “If You Could Read My Mind” nga Gordon Lightfoot.
© KOHA. Të gjitha të drejtat janë të rezervuara.
