Aktori Kevin Spacey dhe kompania e tij filmike duhet t’ia paguajnë më shumë se 30 milionë dollarë studios prapa serialit “House of Cards”, për shkak të humbjeve financiare që i ka shkaktuar shkarkimi i tij nga puna, si pasojë e akuzave për ngacmim seksual.
Në një dokument të dorëzuar në Gjykatën e Lartë të Los Angelesit, thuhet se Spacey i shkeli kushtet e kontratës së tij për sjellje profesionale, duke bërë sjellje të gabuara ndaj disa anëtarëve të ekuipazhit përgjatë pesë sezoneve të serialit, “House of Cards”, ku ai përveç si aktor e kishte edhe rolin e producentit.
Studioja “MRC’ e cila gjendet prapa këtij shou të famshëm, u detyrua ta pushojë nga puna aktorin dhe t’i ndalojë xhirimet e sezonit të gjashtë, veprime këto të cilat iu kushtuan atyre me dhjetëra miliona dollarë humbje.
Zëdhënësit e Kevin Spaceyt nuk kanë pranuar të komentojnë rreth këtij rasti. Avokatët e tij argumentojë se veprimet e aktorit nuk ishin faktori kryesor për humbjet që i pësoi ky shou televiziv.
Akuzat kundër yllit hollywoodian filluan në vitin 2017, kur një aktor i quajtur Anthony Rapp deklaroi se Spacey e kishte ngacmuar seksualisht kur ai ishte vetëm 14-vjeçar. Spacey i kishte kërkuar falje publike Rappit, ani pse ka deklaruar se nuk i kujtohet të ketë ndodhur kjo ngjarje, e cila supozohet se ka ndodhur gjatë kohës kur aktori ishte nën ndikimin e alkoolit.
Po ashtu në vitin 2017, Kevin Spacey u deklarua zyrtarisht si homoseksual, ani pse deklarata e tij u kritikua ashpër nga publiku i cili e akuzoi atë shfrytëzimin e këtij lajmi, për t’i shmangur akuzat kundër tij.
Afërsisht 15 persona të tjerë kanë bërë akuza të ngjashme kundër aktorit, prej kohës kur Anthony Rapp foli publikisht për përvojën e tij të hidhur. Megjithëkëtë asnjë prej këtyre akuzave nuk ka çuar në ndjekje penale të suksesshme.
Spacey vazhdon të deklarohet i pafajshëm ndaj të gjitha akuzave për ngacmim seksual.
Por, nga momenti kur është bërë shënjestër e padive gjyqësore për ngacmim seksual dhe sjellje të pahijshme, aktori i shquar hollywoodian i ka humbur disa projekte të mëdha filmike, dhe besohet se do të jetë pothuajse e pamundur për të, që të rikthehet në skenën e filmit për një të gjatë.
© KOHA. Të gjitha të drejtat janë të rezervuara.
