Pas një viti ku shumica e njerëzve e kanë kaluar kohën më të madhe të mbyllur brenda në shtëpi dhe duke pasur kohë të mjaftueshme për të shikuar televizion, u mbajt edicioni i ri i ceremonisë së ndarjes së shpërblimeve “Emmy”, të cilat i nderojnë më të mirët në fushën e televizionit.
Jason Sudeikis, ylli i komedisë shumë të pëlqyer nga publiku, “Ted Lasso” dhe aktorja veteran, Jean Smart, nga seriali “Hacks”, triumfuan në garën për komedinë më të mirë dhe u shpërblyen me çmime “Emmy” në kategoritë, “Aktori dhe aktorja më e mirë në komedi”.
Kurse shpërblimi “Komedia më e mirë e vitit” iu nda projektit “Ted Lasso”.
Aktorja 70-vjeçare, Jean Smart, e cila u mirëprit me ovacione në skenë, e dha një fjalim prekës dedikuar bashkëshortit të saj aktor, Richard Gilliland, i cili vdiq para gjashtë muajve.
“Nuk do të isha këtu pa Richardin dhe dëshirën e tij për t’i dhënë përparësi karrierës sime”, deklaroi aktorja.
Edhe
U ndanë çmimet “Emmy” në një ceremoni glamuroze
Ylli i hollywoodit i cili së fundmi e ka bërë një kalim të suksesshëm nga projektet filmike në ato televizive, Jason Sudeikis, në fjalimin e tij e kanalizoi personazhin të cilin e luan në serialin, “Ted Lasso”, një trajner jo i zakonshëm amerikan i një ekipi britanik të futbollit.
“Ky shou flet për rëndësinë e familjes, mentorëve dhe shoqërisë, dhe unë nuk do të isha këtu ku jam sot pa i pasur këto gjëra në jetë. Unë jam i mirë, aq sa më bëjnë të dukem mirë të gjithë kolegët e mi,” deklaroi Sudeikis, i cili po ashtu shërben si producent i serialit.
Kurse kolegët e tij, Hannah Waddingham dhe Brett Goldstein, e fituan çmimin e parë “Emmy” në karrierën e tyre. Ata u shpërblyen në kategoritë “Aktori dhe aktorja më e mirë në rol dytësor”, për rolet e tyre në projektin që ua ka ndryshuar jetën, “Ted Laso”.
Aktorët Olivia Colman dhe Josh O’Conor, që të dy pjesë e serialit i cili flet për familjen mbretërore britanike, “The Crown”, arritën të tirumfojnë në kategorinë “Aktorja dhe aktori më i mirë në dramë”, derisa projekti i njohur televiziv i cili është në sezonin e pestë të realizimit, “The Crown”, arriti të fitojë më së shumti shpërblime gjatë mbrëmjes, përfshirë edhe çmimin kryesor “Drama më e mirë e vitit”.
Gillian Anderson dhe Tobias Menzies po ashtu pjesë e kastës së aktorëve të këtij projekti, u nderuan me çmimet “Aktorja dhe aktori më i mirë në rol dytësor”. Anderson, e cila në shoun “The Crown” e portretizon udhëheqësen politike Margaret Thatcher, në fjalimin e saj e falënderoi menaxherin prej 20 vjetësh, për këshillat gjatë karrierës dhe faktin se ka besuar në talentin e saj, para se ajo të besonte në vete.
Aktori dhe aktorja më e mirë në rol dytësor në serial të limituar u shpallën, Evan Peters dhe Julianne Nicholson, për rolet e tyre në serialin i cili flet për krimet dhe familjet jofunksionale, “Mare of Easttown”.
Që të dy, Nicholson dhe Peters, në fjalimin e tyre e falënderuan aktoren e famshme britanike, Kate Winslet, e cila gjatë mbrëmjes arriti ta fitojë një çmim, atë “Aktorja më e mirë në serial dhe film të limituar”, për portretizimin e mrekullueshëm të protagonistes në serialin, “Mare of Easttown”.
Edhe
“Widow’s Bay” shënon sukses të madh, “The Pitt” fiton sërish në “Emmy”
Drama e suksesshme e Netflixit, “The Queen’s Gambit”, arriti të shpërblehet gjatë mbrëmjes, në kategorinë “Drama më e mirë e limituar”.
Afërsisht 500 njerëz e ndoqën ceremoninë e sivjetme “Emmy” e cila zuri vend të dielën mbrëma në Los Angeles, dhe në këtë ngjarje nuk mungoi as glamuri i yjeve mbi qilimin e kuq.
