Rekord shikueshmërie i “The Voice of Australia” me Rita Orën në juri
“The Voice of Australia” tashmë e ka lansuar sezonin e ri, dhe çdo javë po publikohen video të shkurtra nga audicionet e këngëtarëve që po e provojnë fatin për ta fituar garën e njohur muzikore.
Në njërën prej klipeve të postuara në faqen zyrtare të emisionit në “YouTube”, shihet një konkurrente duke e interpretuar hitin “Lonely” të këngëtares Rita Ora.
Dhe me ardhjen e bukuroshes me prejardhje kosovare në këtë shou, është rritur edhe shikueshmëria e “The Voice of Australia”. Në kohë reale të transmetimit, shou i pati 1 milion shikues duke u bërë programi i dytë më i shikuar në vend.
Përveç audiencës së madhe në qytetet australiane, si Sydney, Melbourne, Brisbane, Adelaide dhe Perth, “The Voice Australia” u shikua edhe në shumë vende të botës.
Kur episodi i dytë i emisionit me 1.2 milionë shikues po transmetohej, kishte tejkaluar dy emisionet e tjera jashtëzakonisht të shikuara në Australi, “Australian Survivor”, i cili morri rreth 660,000 shikues dhe “The Nine’s The Block” me 630,000 sish.
Ndërkaq në një tjetër video që po merr shumë vëmendje në rrjetet sociale, është momenti kur një konkurrent i shout të njohur muzikor vendos ta bëjë një vallëzim ekzotik për Rita Orën, me kërkesën e këngëtares së famshme.
Përveç Rita Orës, pjesë e jurisë në “The Voice” janë edhe, Keith Urban, Jessica Mauboy dhe Guy Sebastian.
