Producenti i njohur muzikës dhe ylli i hitit “Uptown Funk”, Mark Ronson, është fejuar.

45-vjeçari ka vetëm disa muaj që është në lidhje me Grace Gummer, vajzën e legjendës hollywoodiane Meryl Streep, por pasi ajo u fotografua me një unazë diamanti në gisht, Ronson vendosi ta konfirmojë lajmin se i ka propozuar martesë të dashurës së tij.

Në një intervistë të fundit, muzikanti i famshëm deklaroi: “Jam fejuar fundjavën e kaluar”.

Ylli i hitit “New Love” u fotografua për herë të parë në një darkë romantike me aktoren 35-vjeçare, në shtator të vitit 2020 por vetëm në mars të këtij viti, çifti e konfirmoi lidhjen e tyre për publikun e gjerë.

“Ai definitivisht është në lidhje romantike me Grace Gummerin. Rregullat e karantinës i kanë vështirësuar gjërat për ta, veçanërisht marrë parasysh faktin se ai është dashur të qëndrojë në Londër, por ata po kalojnë mirë me njëri-tjetrin dhe po provojnë ta shohin si po shkojnë gjërat mes tyre. Mark është një person shumë privat, prandaj e ka mbajtur këtë lidhje në fshehtësi të plotë, por me kalimin e kohës duket se gjërat kanë ndryshuar për ta”, citohet të ketë thënë një burim i afërt.

Ronson besohet se e ka takuar ikonën e kinematografisë Meryl Streep dhe bashkëshortin e saj, Don Gummer, për t’ua kërkuar aprovimin për ta martuar vajzën e tyre.

Prej se i dha fund martesës pesë vjeçare me Josephine de La Baume, në vitin 2017, producenti i njohur muzikor ka qenë në lidhje romantike me disa personalitete, si aktorja britanike Genevieve Gaunt dhe këshilltaren ekzekutive të emisionit “SNL”, Rebecca Schwartz.

Ndërkohë, në të kaluarën, Ronson kishte deklaruar se me shumë dëshirë do ta ndërronte suksesin e tij me rolin e të qenët prind.

Grace Gummer u shkurorëzua nga bashkëshorti i saj, Tay Strathairn, në fund të vitit 2020. Ajo njihet si aktore e disa serialeve televizive, si “Mr. Robot”, “American Horror Story: Freak Show”, “Smash” dhe filmat “Larry Crowne” dhe “Frances Ha”.

{gallery}