Aktorja e njohur amerikane, Halle Berry dhe muzikanti Van Hunt, debutuan për herë të parë si çift mbi qilimin e kuq të dielën mbrëma, në ceremoninë e ndarjes së shpërblimeve “Oscar”.
Dyshja e bëri të ditur lajmin se janë në lidhje në shtator të vitit të kaluar, përmes një postimi në Instagram. Ylli kinematografik i shpërblyer me “Oscar” e pati postuar një fotografi ku shfaqej e veshur me një bluzë e cila e mbante emrin e muzikantit në të.
Por tani, çifti i dashuruar arriti ta shënojë paraqitjen e tyre të parë publike, në ceremoninë prestigjioze e cila zuri vend gjatë fundjavës në Hollywood.
Pas ngjarjes glamuroze, Berry i ndau me fansat disa fotografi të çiftit, modelin e ri të flokëve që bëri bujë në media dhe u kritikua mjaft shumë, dhe fustanin e saj fantastik ngjyrë vjollce të markës “Dolce & Gabbana”.
Debutimi i tyre si çift mbi qilim të kuq vjen pasi muzikanti 51-vjeçar, Van Hunt, së fundmi e shprehi dashurinë që e ka për të dashurën e tij 54-vjeçare, Halle Berry, e cila e ka inspiruar të shkruaj këngë dhe të krijojë muzikë të re për lidhjen e tyre.
Tutje ai pati deklaruar se raporti i tyre ishte shumë frymëzues në shumë mënyra, dhe se ajo e ka bërë një baba më të përkushtuar dhe person më të mirë në të gjitha aspektet e jetës.
Hunt është baba i një djali tinejxher të cilin e ka nga lidhja e tij e kaluar, kurse Berry i ka dy fëmijë, një vajzë dhe një djalë, nga lidhjet e mëparshme me modelin kanadez Gabriel Aubry, dhe aktorin francez Olivier Martinez.
© KOHA. Të gjitha të drejtat janë të rezervuara.
