Bilall Sherifi, anëtar i kryesisë së Nismës, në Interaktiv të KTV-së ka deklaruar se shpallja e njëanshme e Asociacionit të Komunave me shumicë serbe nuk do të duhej të pranohej si akt i kryer nga qeveria e Kosovës.
Duke thënë se Qeveria nuk duhet të negociojë fare me Listën Serbe për Asociacionin, Sherifi thotë se nëse do të bëhej shpallja e një anshme nga serbët, do të krijohej situatë e vështirë në Kosovë.
“Asociacioni siç e kërkojnë serbët nuk do të bëhet. Nuk ka nevojë për negociata me Listën Serbe as me Beogradin, por thjesht duhet të marrë një statut të Asociacionit kushtetues dhe të përfundojë e tërë kjo, por Asociacion me kompetenca ekzekutive nuk ka. Nuk do të ishte aspak situatë e mirë për Kosovën. Do të ishte situatë shumë e vështirë sepse kjo do të ishte shpallje e pavarësisë. Nuk do të duhej të pranohej si akt i kryer vetëm pse ata e kanë shpallë”, ka deklaruar ai.
Sherifi ka kritikuar edhe kryeministrin Ista Mustafa për deklaratat se opozita është fajtore që me bllokimin që po i bën votimit të Demarkacionit, ka shtyrë edhe liberalizimin e vizave për qytetarët.
“Nëse është ashtu siç thotë Mustafa, se opozita është fajtore, përse populli i beson opozitës por jo atij. Sondazhet thonë se 80 për qind të qytetarëve të Kosovës nuk e mbështesin këtë version të demarkacionit. Si është e mundur që populli të besojë se versioni aktual nuk është në rregull. Vetëm 15 për qind e qytetarëve mbështesin këtë qeveri. Qytetarët e kanë kuptuar se problemi është te qeveria e te Isa Mustafa”, ka shtuar ai.
