Me shqetësim i ka parë organizata joqeveritare INPO zhvillimet e së enjtes në Komunën e Prishtinës, kur opozita, e përkrahur nga kryesuesi Fehmi Kupina, shkarkoi aksionarët e vjetër të ndërmarrjeve publike dhe i emëroi të rinjtë, kryesisht nga radhët e veta, por edhe tre “të panjohur”.
Sipas Valmir Ilazit nga kjo organizatë, opozita e përbërë nga Lëvizja Vetëvendosje, Aleanca Kosova e Re, Aleanca për Ardhmërinë e Kosovës dhe Nisma u bashkuan “për t’i kapur ndërmarrjet publike”.
“Sigurisht që INPO i ka përcjellë këto ngjarjes, që mund të themi kushtimisht se ishin edhe shqetësuese sepse po bëhen shumë zhvillime të shpejta, që nganjëherë mund të jenë të paplanifikuara e dihet qartë se cili ishte qëllimi i tyre. Ishte kapja e bordeve apo ndërmarrjeve publike të Komunës së Prishtinës. Shprehim shqetësimin sepse kjo ngjarje u zhvillua shumë shpejt, s’ka pasur informacion të qartë se pse ka ardhur deri këtu, por ata janë arsyetuar me ‘performancë jo të mirë’, por komisioni komunal i aksionarëve detyrohet me ligj të raportojë të paktën një herë në vit. Këtë s’e ka bërë, por kemi parë në mbledhjen e tretë të Kuvendit Komunal, që komisioni komunal i aksionarëve kishte katër pika aty, por që ishin titulluar vetëm si informatë. Edhe ne si shoqëri civile ishim në hije. Nga seanca e fundit pamë se opozita ka hequr atë ‘informatë’ dhe nga ajo ditë nisën përçarjet. E si u pa edhe dje, u ndërruan komplet komisioni komunal i aksionarëve”, ka thënë ai në emisionin “038” të KTV-së të premten.
Ilazi ka deklaruar se ligji për ndërmarrjet publike nuk e tregon qartë se kush mund të jetë aksionar, bazuar në atë se tre nga të zgjedhurit e rinj s’janë pjesë e Asamblesë.
Ai ka shprehur habinë me mosreagimin e pushtetit, ndërsa ka thënë se ka qenë shqetësuese mospjesëmarrja e kryetarit Përparim Rama në mbledhjen e Asamblesë.
Sipas tij, në Prishtinë gjithmonë “betejat pushtet-opozitë kanë treguar se dërgojnë në sinjale të caktuara”, e se përplasja e re “mund të jetë me prishje të bashkëpunimit e pasojë është se shumë procese e vendime s’do të mund të kalojnë nëse s’ka koordinim pushtet-opozitë”.
Ai ka thënë se shpesh bordet janë ato që më së shumti po i prishin raportet pushtet-opozitë.
© KOHA. Të gjitha të drejtat janë të rezervuara.
