Pavarësisht rritjes së numrit të mërgimtarëve të interesuar për të votuar në zgjedhjet komunale, institucionet nuk kanë bërë asnjë hap për t’ua lehtësuar atyre këtë proces. Ata, edhe kësaj radhe janë përballur me procedurat e shumta të aplikimit. Derisa disa prej mërgimtarëve që në zgjedhjet e kaluara u është refuzuar aplikimi, për zgjedhjet e 17 tetorit kanë vendosur që të udhëtojnë për në Kosovë për të votuar fizikisht.

Pamundësia që të votojë me postë nga Zvicra në dy palë zgjedhjet e kaluara ka bërë që mërgimtari Hilmi Gashi të mos jetë në mesin e 15 mijë mërgimtarëve që pritet të votojnë për zgjedhjet e 17 tetorit.

Për pasojë, ai thotë se do të detyrohet që të bëjë rrugë nga shteti zviceran për të votuar fizikisht në Kosovë.

“Nëse unë tash aplikoj për me votu prej Zvicrës nëpërmjet postës dhe më mohohet kjo e drejtë atëherë unë edhe në Kosovë nuk kam të drejtë me votu. Për këtë arsye nuk dua me humb shansin përderisa të sqarohet kjo. Do ta shfrytëzoj të drejtën e votës në Kosovë edhe pse kushton, merr kohë dhe tash sidomos në rastin e pandemisë ku kemi frikë nga përhapja shumë e madhe e virusit ka me qenë një sfidë e madhe”, ka thënë ai.

Sfidues e i kushtueshëm, votimi përmes postës nga Gjermania në zgjedhjet e kaluara ishte edhe për Beqir Muratin. Pas vështirësive për të votuar edhe ai thotë se kësaj radhe do të udhëtojë për të votuar në komunën e tij.

“Ne kurbetçarët po duhet të humbin shumë kohë, jemi të punësuar, po duhet të marrim leje nga puna për të shkuar te posta dhe për ta dërguar. Për atë e kemi pasur të vështirë, por tash unë kur të jem fizikisht në Kosovë atëherë do ta kryej obligimin tim qytetar”, është shprehur Murati.

5 mijë e 56 më shumë aplikime janë aprovuar për zgjedhjet e sivjetme, krahasuar me ato të vitit 2017.

Mirëpo, pavarësisht rritjes së interesimit nga diaspora për të votuar në garat komunale, organizata "Germin" thotë se shteti nuk ka ndërmarrë kurrfarë veprimi për të mbajtur këtë trend përmes lehtësimit të procedurave të aplikimit dhe votimit.

Megjithatë, kësaj radhe vlerësohet pozitiv afati më i gjatë në dispozicion për të dërguar votat.

“E mira e këtyre zgjedhjeve është që janë zgjedhje të rregullta dhe afati është një muaj kohë, prej 15 shtatorit deri më 15 tetor mund t'i dërgojnë të gjithë ata që janë të regjistruar mund t'i dërgojnë zarfet e tyre me fletëvotime në Kosovë. Kjo përveç aspektit kohor që kanë më shumë kohë, mundëson edhe kostoja të jetë më e ulët”, ka thënë Sihana Bejtullahu nga kjo organizatë.

Një iniciativë për ndryshimin e Ligjit për Zgjedhjet e Përgjithshme, Qeveria Kurti e nisi në prill të këtij viti kur vendi rrezikonte të shkonte në zgjedhje të parakohshme në rast se dështonte zgjedhja e presidentit.

Ekzekutivi e arsyetoi nismën me lehtësimin e procedurave të votimit për mërgimtarët, por ajo ishte tërhequr pas presionit publik dhe vlerësimeve se iniciativa ishte bërë për përfitime partiake.

Por, 6 muaj pas, Qeveria nuk ka nisur procedurat as për ndryshimin e këtij ligji.