A është ekuilibri çelësi për një jetë më të gjatë? Njerëzit e moshës së mesme që nuk mund të qëndrojnë në një këmbë për 10 sekonda, kanë gati dy herë më shumë gjasa të vdesin brenda një dekade, sipas një studimi të ri. Shkencëtarët në Brazil thonë se testi i thjeshtë dhe i sigurt i ekuilibrit duhet të bëhet pjesë e një kontrolli rutinë shëndetësor për të moshuarit, shkroi të mërkurën “USA Today”.
Ndryshe nga ushtrimet, forca e muskujve dhe fleksibiliteti, ekuilibri duhet të jenë relativisht të qëndrueshme, derisa dikush të arrijë të 50-at, pastaj fillon të zbehet me shpejtësi. Megjithatë, testimi për ekuilibrin nuk është një pjesë normale e kontrolleve të rregullta shëndetësore për njerëzit e moshës së mesme, ndoshta sepse nuk ka asnjë test të standardizuar dhe ka pak të dhëna, thonë studiuesit.
Studimi i botuar në British Journal of Sports Medicine, përfshiu më shumë se 1,700 pjesëmarrës midis 51 dhe 75 vjeç (mosha mesatare 61), midis shkurtit 2009 dhe dhjetorit 2020. Rreth dy të tretat (68%) ishin burra.
1 në 3 të rritur nuk mundi ta kalojë testin e ekuilibrit.
Autorët e studimit matën peshën e secilit person dhe gjerësinë e belit. Ata gjithashtu mblodhën detaje të historisë së tyre mjekësore.
Si pjesë e kontrollit, pjesëmarrësit duhej të qëndronin në njërën këmbë për 10 sekonda pa asnjë mbështetje shtesë. Atyre iu kërkua të vendosnin pjesën e përparme të këmbës së lirë në pjesën e pasme të këmbës në tokë, duke mbajtur krahët anash dhe shikimin e fiksuar drejt përpara. Studiuesit lejuan çdo person ta provonte atë deri në tre herë në secilën këmbë.
Një në pesë (20.5%) nuk e kaloi testin dhe kjo përqindje u rrit së bashku me moshën. Mes atyre 51 deri në 55 vjeç, gati pesë për qind dështuan. Tetë për qind kanë dështuar ndërmjet moshës 56 dhe 60 vjeç. 18 për qind kanë dështuar ndërmjet moshës 61 dhe 65, dhe më shumë se një në tre (37%) kanë dështuar ndërmjet moshës 66 dhe 70.
Më shumë se gjysma e atyre 71 deri në 75 vjeç nuk ishin në gjendje ta përfundonin testin. Gjatë një periudhe monitorimi prej shtatë vjetësh, kanë vdekur 123 (7%) persona.
Përqindja e vdekjeve në mesin e atyre që dështuan në test ishte dukshëm më e lartë. Në përgjithësi, ata që dështuan në testin e bilancit kishin shëndet më të dobët. Shumë prej tyre ishin obezë, kishin sëmundje të zemrës ose shtypje të lartë të gjakut dhe yndyrë në gjak.
