Organizata Botërore e Shëndetësisë ka përcaktuar se “çrregullimi i video-lojërave” është një çrregullim i ri i shëndetit mendor.
Agjencia shëndetësore e OKB-së njoftoi se luajtjen ekstreme të video lojërave do ta shtojë si çrregullim në edicionin e 11 të manualit Klasifikimi Ndërkombëtar i Sëmundjeve (ICD- International Classification of Diseases).
“ICD-ja është një produkt me të cilin OBSH-ja është me të vërtetë krenare,” tha dr. Tedros Adhanom Ghebreyesus, drejtori i përgjithshëm i OBSH-së, në një njoftim për shtyp, transmeton Koha.net. “Kjo na mundëson të kuptojmë shumë për atë se çfarë i bën njerëzit të sëmuren dhe të vdesin, dhe të ndërmarrin hapa për t’i parandaluar vuajtjet dhe për të shpëtuar jetë”.
OBSH-ja tha se ekipi i ICD-së i mori më shumë se 10,000 rishikime të propozuara për edicionin më të ri të dokumentit. Në maj të vitit 2019, ICD-11 do të prezantohet në Asamblenë Botërore të Shëndetësisë për t'u miratuar nga shtetet anëtare dhe do të hyjë në fuqi në janar të vitit 2022.
OBSH-ja tha se publikimi i hershëm do t’ua mundësojë vendeve “ta planifikojnë mënyrën se si ta përdorin versionin e ri, t’i përgatisin përkthimet dhe t’i trajnojnë profesionistët shëndetësorë në të gjithë vendin”.
Edhe
OBSH njeh zyrtarisht si sëmundje varësinë ndaj lojërave kompjuterike
Përveç kësaj, ICD-ja përdoret gjithashtu nga ofruesit e sigurimit shëndetësorë, rimbursimet e të cilëve varen nga kodifikimi i ICD-së, si dhe nga menaxherët kombëtarë të programeve shëndetësore, specialistët e mbledhjes së të dhënave dhe të tjerët që e ndjekin progresin në shëndetin global dhe e përcaktojnë ndarjen e burimeve shëndetësore.
Manuali e definon çrregullimin e video lojërave si “të karakterizuar nga një model i sjelljes së vazhdueshme ose të përsëritur të luajtjes së lojërave”, dhe e vë theksin në luajtjen online të lojërave.
Çrregullimi mund të përbëhet nga një kontroll i dëmtuar gjatë shpeshtësisë, intensitetit dhe kohëzgjatjes së lojërave, duke e rritur prioritetin e dhënë për lojërat deri në pikën që ajo (loja) fiton më shumë përparësi se aktivitetet dhe angazhimet e tjera të përditshme, dhe vazhdimin ose përshkallëzimin e luajtjes së lojërave pavarësisht pasojave negative në pjesët e tjera të jetës.
OBSH-ja tha se kjo situatë është mjaft e rëndë për të rezultuar në “dëmtime të mëdha në fushat personale, familjare, sociale, edukative, profesionale ose në fusha të tjera të rëndësishme të funksionimit”.
Ajo mund të jetë e vazhdueshme ose episodike dhe e përsëritur, por aspektet e çrregullimit zakonisht janë të dukshme për të paktën 12 muaj në mënyrë që ta kërkojnë një diagnozë.
dr. Vladimir Poznyak, anëtar i Departamentit të OBSH-së për Shëndet Mendor dhe Abuzim me Substanca, tha për CNN se numri i njerëzve të klasifikuar me këtë çrregullim është “shumë i ulët”.
“Miliona gamerë në mbarë botën, madje edhe kur është fjala për luajtje intensive të lojërave, nuk do të kualifikoheshin kurrë si njerëz që vuajnë nga çrregullimi i video lojërave”, tha Poznyak, përcjell Koha.net. “Dhe më lejoni të theksoj se kjo është një gjendje klinike dhe diagnoza klinike mund të bëhet vetëm nga profesionistët e shëndetësisë të cilët janë të trajnuar siç duhet për ta bërë këtë.”
Ai tha se shumica e ndërhyrjeve ose trajtimeve janë “të bazuara në parimet dhe metodat e terapisë kognitivo-biheviorale (të sjellje)”. Ato përfshijnë ndërhyrje psiko-sociale, mbështetje sociale, të kuptuarit e çrregullimeve dhe mbështetje familjare.
Edhe
Varësia nga video-lojërat në të ardhmen mund të konsiderohet si sëmundje
Edicioni i ri i ICD-së gjithashtu përfshinë kapituj mbi mjekësinë tradicionale, e cila kurrë nuk është klasifikuar, si dhe një kapitull të ri mbi shëndetin seksual që i bashkon çrregullimet e kategorizuara më parë në mënyra të tjera.
“Një parim kyç në këtë rishikim ishte thjeshtimi i strukturës së kodimit dhe përpunimit elektronik - kjo do t'u mundësojë profesionistëve të kujdesit shëndetësor që t’i regjistrojnë më lehtë dhe më tërësisht gjendjet”, tha dr. Robert Jakob, udhëheqësi i ekipit të OBSH-së të quajtur Classifications Terminologies and Standards.
