Ekspertët rrëzojnë mitin se moti i ftohtë të sëmurë drejtpërdrejt

Moti i ftohtë nuk i shkakton drejtpërdrejt sëmundjet si ftohja apo gripi, të cilat shkaktohen nga viruset.

Megjithatë, ekspertët shpjegojnë se temperaturat e ulëta ndikojnë në disa faktorë biologjikë, mjedisorë dhe shoqërorë që e rrisin rrezikun për infeksione të rrugëve të frymëmarrjes, ka raportuar The Independent.

Sipas autores së këtij teksti, Manal Muhammed, e cila është ligjëruese për mikrobiologji mjekësore në Universitetin e Wesminsterit, viruset e kanaleve të frymëmarrjes, të njohura si respiratore, përfshirë gripin, mbijetojnë më gjatë dhe mbeten më ngjitëse në kushte të ftohta dhe të thata.

“Ajri i thatë bën që pikat e vogla që mbajnë virusin të qëndrojnë më gjatë në ajër, duke e lehtësuar përhapjen e infeksionit”, ka thënë ajo.

Frymëmarrja e ajrit të ftohtë mund të dobësojë mbrojtjen natyrore të trupit në hundë dhe rrugët e frymëmarrjes.

Sipas Muhammed, i ftohti ul qarkullimin e gjakut në këto zona dhe dëmton funksionimin e mukozës, e cila zakonisht ndihmon në kapjen dhe largimin e viruseve.

Si pasojë, viruset e kanë më të lehtë të vendosen dhe të shkaktojnë infeksion.

Ndryshimet sezonale në sjelljen e njerëzve luajnë gjithashtu rol të rëndësishëm.

Gjatë dimrit, njerëzit kalojnë më shumë kohë në ambiente të mbyllura, shpesh me ajrosje të dobët, çka favorizon përhapjen e viruseve.

Po ashtu, mungesa e dritës së diellit gjatë muajve të ftohtë mund të çojë në ulje të nivelit të vitaminës D, e cila lidhet me funksionimin normal të sistemit imunitar.

Muhammed ka theksuar se moti i ftohtë duhet parë si “faktor që rrit rrezikun”, dhe jo si shkak i drejtpërdrejtë i sëmundjes.

Sipas saj, kuptimi i kësaj ndihmon në parandalim më të mirë, përmes masave si ajrosja e mirë e ambienteve të brendshme, ruajtja e lagështisë së ajrit dhe kujdesi për shëndetin e përgjithshëm.