Zyrtarët shëndetësorë thonë se ka dëshmi të shumta se një virus i zakonshëm ka të bëjë me rastet e rralla të hepatitit që po paraqiten te fëmijët, raporton BBC.
Në nivel botëror, 169 raste janë regjistruar dhe një i vdekur.
Vetëm në Britani të Madhe, 114 fëmijë janë sëmurë dhe 10 prej tyre kanë nevojë për transplantim të mëlçisë.
Agjencia e Sigurimeve Shëndetësore të Britanisë (UKHSA) ka thënë se një variant i adenovirusit i quajtur F41, me shumë gjasë është prapa shumicës së rasteve.
Shumica e fëmijëve të prekur janë të moshës 5-vjeçare apo edhe më të rinj dhe kanë simptome të gastroenteritit – diarre dhe vjellje – pasuar nga zverdhja e lëkurës dhe syve, një shenjë që ke probleme në mëlçi.
Edhe
Hepatiti i mistershëm te fëmijët shpërndahet në 12 vende
Meera Chand, drejtoreshë në UKHSA thotë se informacionet e mbledhura nëpërmjet hetimeve tregojnë se kjo rritje e befasishme e rasteve të hepatitit te fëmijët është e lidhur me infeksion me adenovirus.
“Por po hetojmë po ashtu për shkaqe tjera potenciale”, ka thënë Chand.
Ekspertët thonë se shumica e fëmijëve që infektohen me adenovirus nuk bëhen aq keq. Por, rastet e inflamacionit të mëlçisë – të njohura si hepatit – janë të rralla, mirëpo mund të jenë shumë të rrezikshme.
