Pushteti në Britani pajtohet se burrat dhe gratë duhet të bëjnë njëjtë punë në shtëpi. Por prapë se prapë janë gratë ato që i kryejnë të gjitha këto punë.
Më shumë se tre të katërtat e të anketuarve në “British Social Attitudes Survey” thanë se punët e shtëpisë duhet të ndahen, raporton BBC.
Megjithatë, dy të tretat thanë se gratë bëjnë më shumë se që ju takon sa i përket larjes dhe hekurosjes. Dhe shumica thanë se gratë ende bëjnë pjesën më të madhe të pastrimit dhe gatimit.
Por, idetë për rolet gjinore kanë ndryshuar në mënyrë të konsiderueshme që nga vitet 1980. Atëherë shumica e njerëzve pajtoheshin me frazën “burrat punojnë kurse gratë përkujdesen për shtëpinë”.
Në anketimin e sivjetmë 9% pajtohen me këtë frazë. Por 63% e grave të anketuara thanë se i bëjnë vet punët e shtëpisë. Dhe vetëm 22% e burrave thanë se kishin mbi supe pjesën më të madhe të barrës, me 32% që pranuan se bëjnë më pak se ç ‘duhet.
Shkencëtarët socialë i referohen fenomenit si "ndërrimi i dytë", me gratë që mbajnë mbi supe shumicën e detyrave shtëpiake dhe të kujdesit për fëmijët si dhe marrin pjesë në tregun e punës.
Të ardhurat shtëpiake
Në vitin 1983, kur filloi sondazhi i BSA-së, shkalla e punësimit të femrave për 16-64-vjeçarët ishte 54%.
Deri në vitin 2023, kjo ishte rritur në 72%. Dhe pjesëmarrja e nënave në tregun e punës nuk ka qenë kurrë më e lartë.
Në anën tjetër, 78% e burrave në moshë pune kishin një punë që paguhet në vitin 1983. Përqindja e burrave sot është 79%.
Në vitin 1989, rreth gjysma e të anketuarve thanë se si burri, ashtu edhe gruaja duhet të kontribuojnë në të ardhurat e familjes.
Ndarja e vazhdueshme e pabarabartë e punës midis burrave dhe grave përforcohet si nga normat e punës, ashtu edhe nga politika publike, thotë sondazhi.
Mbetet një hendek midis qëndrimeve dhe praktikës, me gratë që vazhdojnë të marrin më shumë punë shtëpiake në raport me burrat.
"Pavarësisht nga disa përparime, Mbretëria e Bashkuar është pra shumë larg nga shikimi i një revolucioni të plotë të rolit gjinor në familje", kanë thënë autorët.
Gjithashtu, anketa, e bazuar në 6.638 intervista me të rriturit nga shtatori deri në tetor të vitit të kaluar, sugjeron se Britanisë i duhet ende të trajtojë “kufirin përfundimtar” të barazisë gjinore.
(Përgatiti: Vita Abrashi-Kajtazi)
© KOHA. Të gjitha të drejtat janë të rezervuara.
