Përpjekjet për të kufizuar ligjërisht qasjen e fëmijëve në rrjetet sociale në Shtetet e Bashkuara të Amerikës janë shtuar dukshëm.
Nuk do të ketë më qasje në mediat sociale për fëmijët nën 18 vjeç pa lejen e prindërve. Ky do të jetë standardi i ri në Utah të SHBA-së, kur dy ligje të reja të nënshkruara nga guvernatori republikan Spencer Cox do të hyjnë në fuqi në mars 2024.
“Administrata jonë është shumë e shqetësuar se si mediat sociale po ndikojnë tek fëmijët. Shkalla e depresionit tek të rinjtë dhe probleme të tjera të shëndetit mendor janë në rritje, dhe kompanitë e mediave sociale e dinë se produktet e tyre janë toksike”, ka thënë Cox.
Guvernatorët dhe ligjvënës të tjerë në disa shtete gjithashtu duan që kompanitë e rrjeteve sociale të mbajnë përgjegjësi për ato elemente që ata argumentojnë se “krijojnë vartësi”.
Megjithatë, nuk ka asnjë provë shkencore për të arritur në përfundimin se rrjetet sociale janë shkaku i vetëm i problemeve të shëndetit mendor tek të miturit, ka thënë Mitch Prinstein nga Shoqata Amerikane e Psikologjisë.
“Në vend të kësaj, duhet të flasim se cilat janë veçoritë specifike të ndërtuara në platformat e rrjeteve sociale dhe cila është përmbajtja specifike ndaj të cilës fëmijët mund të ekspozohen në mediat sociale, që mund të jetë e dobishme ose e dëmshme për cilin fëmijë”, ka deklaruar Prinstein.
“Meta”, kompania që ka në pronësi Instagramin, ka thënë për “Zërin e Amerikës” në një deklaratë, se përveç heqjes së përmbajtjes që nxit vetëdëmtimin, ajo ka mjete që i ndihmojnë adoleshentët të kenë përvoja të përshtatshme për moshën.
Snapchati punon vazhdimisht për ta bërë platformën më të sigurt, ka thënë një zëdhënës i kompanisë.
Megjithatë, shkollat në Seattle dhe shtete të tjera kanë ngritur padi duke fajësuar gjigantët e teknologjisë për një krizë të shëndetit mendor mes nxënësve.
Sipas ekspertes së mediave digjitale, Katie Davis, rrjetet sociale shpesh përforcojnë dobësitë që ekzistojnë, por janë mjete që kanë edhe aspekte pozitive.
“Për sa i përket qasjes së adoleshentëve në informacion dhe mbështetjes në internet për identitetet e ndryshme që ata po eksplorojnë”, ka thënë Davis..
Rrjetet sociale krijojnë gjithashtu mundësi edukimi, ka thënë studiuesja Linda Charmaraman, konsulente e pavarur për “Metën”.
Ajo ka inkurajuar gjigantët e teknologjisë që të punojnë më ngushtë me shkencëtarët dhe të gjejnë mënyra efektive për të mbështetur mirëqenien e përdoruesve të rinj të rrjeteve sociale.
Charmaraman ka shprehur besimin gjithashtu se prindërit dhe mësuesit duhet të jenë të përgatitur mirë për përfitimet dhe sfidat e rrjeteve sociale, në mënyrë që të mund të identifikojnë sjelljet e padëshiruara te fëmijët dhe të ofrojnë udhëzime përkatëse.
