Tri studime të reja që do të prezantohen në sesionin e përvitshëm shkencor të Kolegjit Amerikan të Kardiologjisë, të bazuara në të dhënat e mbledhura nga një numër i ndryshëm pjesëmarrësish, kanë vërtetuar se pirja e kafesë, veçanërisht dy deri në tre filxhanë në ditë, nuk lidhet vetëm me një rrezik më të ulët për sëmundje të zemrës, por edhe me jetëgjatësinë, raportoi të dielën portali “Eat This, Not That”.
Për shkak se kafeja mund t’i shpejtojë rrahjet e zemrës, disa njerëz shqetësohen se pirja e saj mund t’i shkaktojë ose përkeqësojë disa probleme të zemrës. Prandaj shumica e këshillave mjekësore deri më tani, e rekomandonin ndalimin e pirjes së kafesë.
Por hulumtimet e fundit sugjerojnë që konsumimi i përditshëm i kafesë nuk duhet të dekurajohet, por të përfshihet si pjesë e një diete të shëndetshme për njerëzit me dhe pa sëmundje të zemrës.
Arsyeja pse rekomandohet pirja e dy apo tre filxhanëve të kafesë në ditë për shëndetin e trupit, lidhet me faktin se kjo pije i përfshin një sërë përbërësish të shëndetshëm që mund të kontribuojnë në këtë fenomen.
Kafeja përmban antioksidantë që mund të ndihmojnë në nxitjen e metabolizmit, duke mbajtur peshën nën kontroll, pengojnë zorrët të thithin yndyra të caktuara dhe bllokojnë receptorët që janë të përfshirë në ritmet jonormale të zemrës. Kafeja gjithashtu mendohet të jetë mbrojtëse e mëlçisë dhe e parandalon zhvillimin e diabetit.
Për efekte pozitive të kafesë, sugjerohet kujdes i shtuar për mënyrën se si pihet ajo. Nuk duhet përdorur shumë sheqer të bardhë, kremra dhe ëmbëlsues artificial, pasi ato përmbajnë yndyra të cilat janë të dëmshme për organizmin. Kafeja e zezë është më e shëndetshmja për t’u konsumuar.
Gjithashtu, nuk duhet abuzuar asnjëherë me sasinë e konsumimit ditorë të kafesë.
© KOHA. Të gjitha të drejtat janë të rezervuara.
