Agjencia Evropiane e Barnave ka rekomanduar autorizimin e dy ilaçeve të reja kundër COVID-19 për personat në rrezik të sëmundjes së rëndë.
Në një deklaratë të enjten, rregullatori i BE-së i barnave tha se kishte arritur në përfundimin se terapitë monoklonale të antitrupave - një kombinim i ilaçit casirivimab dhe imdevimab, dhe ilaçi regdanvimab - janë provuar të dyja se reduktojnë ndjeshëm rrezikun e shtrimit në spital dhe vdekjes në pacientët e rrezikuar ndaj COVID-19.
EMA e përshkroi profilin e sigurisë së të dy ilaçeve si "të favorshëm" dhe tha se pavarësisht një numri të vogël efektesh anësore, "përfitimet e barnave janë më të mëdha se rreziqet e tyre".
EMA tha se si regdanvimabi ashtu edhe kombinimi i ilaçeve casirivimab dhe imdevimab duhet t'u ofrohen njerëzve mbi 12 vjeç që nuk kanë nevojë ende për mbështetje me oksigjen, por janë në rrezik të përkeqësimit për shkak të COVID-19. Ai tha se ilaçi i kombinuar mund të përdoret gjithashtu edhe si parandalues, raporton AP.
Trajtimet me antitrupa mbeten një nga një sërë terapish që mund të zbehin efektet më të këqija të COVID-19 dhe ato janë opsioni i vetëm i disponueshëm për njerëzit me raste të lehta deri në mesatare, të cilët nuk janë ende në spital.
