Adam Castillejo është bërë personi i dytë në botë që është shëruar nga virusi HIV, kanë njoftuar mjekët, raporton BBC-ja.

Sipas revistës shkencore “Lancet HIV”, Castillejo nuk e ka më këtë virus shkatërrues në organizëm edhe pas 30 muajve, qëkur ka ndërprerë terapinë anti-virusale.

Por, londinezi nuk u shërua nga ilaçet kundër HIV-it, por falë transplantimit të qelizave burimore, të cilat i mori pasi vuante edhe nga kanceri.

Në vitin 2011, Timothy Brown, i njohur si “Pacienti i Berlinit” u bë personi i parë i kuruar nga HIV-i falë një terapie të njëjtë.

Profesori i Universitetit të Cambridget, Ravindra Kumar Gupta, ka thënë për BBC-në: “Kjo sigurisht paraqet ilaçin kundër HIV-it”.

Megjithatë kjo metodë nuk mund të praktikohet në gjithë botën, pasi bartë rrezik të madh. Gupta thotë se metoda mund të përdoret si mundësi e fundit për ata që vuajnë po ashtu nga kanceri.

Ilaçet aktuale kundër HIV-it u mundësojnë të infektuarve të vazhdojnë jetën me virusin, por pa e eliminuar atë.

Gjithsesi transplantimi i qelizave burimore si terapi rrit shpresën për zbulimin e një ilaçi në të ardhmen.

“Unë dua të bëhem ambasador i shpresës”, ka thënë Castillejo për “New York Times”.