Lifestyle

Blerina Jahiri sjell në jetë pasionin e saj të fëmijërisë

Një ndër profesionet më të përhapura dhe fitimprurëse të kohëve moderne është dizajni i modës.

Atraktiviteti që ofron si profesion dhe mundësitë e shumta të shprehjes dhe krijimtarisë, kanë bërë që shumë të rinj të talentuar ta kthejnë modën nga pasioni në biznes.

Blerina Jahiri, disenjatore e re dhe mjaft e veçantë, tregon se qepja dhe dizajni kanë qenë pasion i saj që kur ishte fëmijë dhe krijonte rroba për kukullat e saj.

E veçantë e kreacioneve të Blerinës janë materialet e përpunuara, të cilat janë diçka e re në këtë treg, raporton “Express” i KTV-së. Të qëndisura e të zbukuruara në mënyra të ndryshme, çdo veshje nga koleksioni i saj i fundit vjen unike.

Përveç rrobave, ajo ka sjellë edhe një koleksion me çanta të njohura si, “Tote Bags”, dhe të cilat konsiderohen shumë të përshtatshme për përditshmërinë e secilit.

Kreacionet e saj përveç që janë unike, gjithmonë janë edhe të personalizuara sipas dëshirave të klientëve, ndërsa kërkesat janë nga më të ndryshmet.

Inspirimin për kreacionet e saj, Blerina e gjen në natyrë e shumë shpesh edhe në tema e ngjarja e sociale, gjë që e ka bërë të ketë sukses e të dallohet në një fushë ku ka mjaft konkurrencë.

Sipas Blerinës, për të qenë një disenjator i suksesshëm, përveç kreativitetit dhe talentit duhet kushtuar rëndësi edhe në kualitetin dhe komoditetin që ofron një veshje.