Një peshkatar kenian ka notuar 5 kilometra për t’iu arratisur policisë.
Ai u hodh në Liqenin Victoria në mënyrë që ti shpëtonte oficerëve të armatosur detarë të Ugandës, që i konfiskuan varkën gjatë një ekspedite peshkimi pranë plazhit të Majanjit.
Ben Wandera nga fshati Buduong’i tha se notoi për rreth 5 kilometra për të shpëtuar jetën e tij.
Ai rrëfeu se gjatë incidentit të orës 01:00 të natës, tre kolegët e tij u arrestuan dhe u dërguan në një kamp ndalimi në Ugandë.
“Ushtarët na zunë pritë kur po hidhnim rrjetat e peshkimit dhe filluan të na gjuanin. Ishin rreth 10 oficerë në një varkë të zakonshme të armatosur me armë”, tregoi ai, transmeton ksp.
Me ndihmën e xhaketës që kishte veshur notoi në brigjet e liqenit pranë qytetit Sio Port.
“U hodha në liqen për ti tërhequr vëmendjen me shpresën se ata do të linin të qetë kolegët e mi. Por ndërsa notoja i dëgjoja të qarat e tyre. Ushtarët nuk e morën mundimin për të më ndjekur”, shtoi peshkatari.
Ai i kërkoi presidentit Uhuru Kenyatta që të vendosë menjëherë oficerë detarë kenianë për t’i mbrojtur nga sulmet.
