Kanë kaluar gati 100 vjet qëkur u zbulua varri i mbretit Tutankamen në Luginën e Mbretërve. Ai është bërë faraoni më i famshëm egjiptian i lashtë në botë, falë gjendjes së jashtëzakonshme të vendit të tij të fundit të prehjes dhe artefakteve të gjetura pranë trupit të tij.
Maska e artë e vdekjes së një djali mbret.
Mbreti Tutankamen ishte faraoni i ri, varri i lashtë dhe artefaktet e pasura të të cilit kanë magjepsur brezat qëkur u zbuluan për herë të parë.
Për shumë njerëz, "Mbreti Tut" është simboli më i madh i lavdisë së Egjiptit të lashtë.
Tutankameni u ngjit në fron në moshën nëntëvjeçare, duke sunduar deri në vdekje në moshën 18 ose 19 vjeç.
Varri i tij u gjet nga egjiptologu britanik, Howard Carter, në vitin 1922.
"Këtë vit, ne po festojmë jo vetëm në Egjipt, por në të gjithë botën zbulimin e Tutankamenit njëqind vjet më parë. Është njëqindvjetori i zbulimit të varrit të mbretit Tutankamen. Ai e çmendi gjithë botën nga objektet e paprekura që u gjetën brenda varrit të tij”, thotë Mostafa Waziri, sekretar i përgjithshëm i Këshillit Suprem të Antikiteteve në Egjipt.
Zbulimi i varrit 3000-vjeçar ishte një moment i rëndësishëm në arkeologji.
Arkivoli i jashtëm i Tutankamenit është bërë prej druri dhe praruar me ar.
Ai u gjet pranë mijëra thesareve të tjera, të patrazuara nga grabitësit.
"Varri i Tutankamenit ishte i vetmi varr që u zbulua pothuajse i paprekur në Luginën e Mbretërve. Kjo është një histori kaq e bukur dhe e gjatë. Kur Carter zbuloi varrin më 4 nëntor 1922, ai gjeti 5.398 artefakte. Shumica e tyre ishin flori. Varri në vetvete është një varr shumë modest, është një varr shumë i vogël në krahasim me varret e tjera në Luginën e Mbretërve”, thotë Waziri.
Misteri e ka rrethuar Tutankamenin që nga zbulimi i tij, nga një mallkim i supozuar mbi varrin e tij deri te pasiguria rreth mënyrës se si vdiq.
Por në vitin 2005, studiuesit bënë skanime CT të trupit të tij dhe ishin në gjendje të hedhin pak dritë mbi atë enigmë të veçantë.
“Ai vdiq për shkak të një aksidenti. Dhe vdiq në ditën e dytë të këtij aksidenti”, thotë Waziri, duke shtuar se faraoni gjithashtu kishte malarie të rëndë dhe kocka të dobëta.
Tutankameni dhe artefaktet në varrezën e tij përfundimisht do të shfaqen së bashku në Muzeun e ri të Madh Egjiptian në Giza kur të hapet.
“Do të jetë hera e parë në histori që ato 5.398 artefakte do të ekspozohen në një muze”, thotë Waziri.
