Një burrë nga Teksasi u arrestua për atë që autoritetet e kanë quajtur mashtrim romantik në internet. Ai, duke u paraqitur si gjeneral i ushtrisë, mashtroi disa gra duke përfituar në total afër 1 milion dollarë, raportoi AP-ja të mërkurën.
Fola Alabi i njohur edhe si Folayemi Alabi, 51 vjeç, u arrestua në shtëpinë e tij dhe është paditur për mashtrim në internet, mashtrim përmes postës dhe pastrim parash, kanë thënë prokurorët federalë.
Alabi i cili pretendoi të ishte gjeneral i stacionuar jashtë vendit të tij, u miqësua me gra në rrjete sociale në data të ndryshme vitin e kaluar, duke fituar gradualisht besimin e tyre dhe duke bërë sikur ka interes romantik e personal.
Grave iu kërkua të dërgonin para për gjeneralin e rremë që ta ndihmonin t’i dërgonte gjësendet e tij në SHBA. Atyre iu kërkua të dërgojnë para në kompani në Teksas të kontrolluara nga Alabi ose dikush i lidhur me të.
Shumica e grave ishin në të 70-at e 80-at e tyre dhe të veja ose të divorcuara.
Një grua nga Arizona humbi 334.000 dollarë. Ajo ndjeu “turp, siklet dhe faj pse u mashtrua” dhe nuk kishte para të mjaftueshme për ushqim apo të paguante faturat.
Një 78-vjeçare nga Rhode Island dërgoi 60,000 dollarë dhe do të dërgonte edhe 240,000, por banka ku i kishte paratë kishte dyshime se ajo mund të ishte viktimë e mashtrimit dhe ia ngriu llogarinë, thanë autoritetet.
Në një rast të ngjashëm, Alabi paditet me mashtrimin e një gruaje në Florida, duke u shtirur sikur vëllai i saj.
© KOHA.
