Ushtria e Hungarisë ka gjetur një mision të ri për një qen të talentuar, i cili u shpëtua nga pronarët abuzues, duke rekrutuar Loganin 2-vjeçar për të shërbyer në operacionet kundër terrorizmit për një skuadër elitare bombash, raportoi AP të shtunën.
Qeni belg po i nënshtrohet trajnimit intensiv si një qen zbulues eksplozivi për regjimentin e asgjësimit të mjeteve shpërthyese.
Në hapësirën e njësisë në lumin Danub në Budapest, Logan bën ushtrime të përditshme socializimi dhe bindjeje dhe trajnohet të njohë erën e 25 substancave të ndryshme shpërthyese.
"Ai tashmë ka filluar të mësojë se si të nuhasë eksplozivët në një mjedis plotësisht homogjen, dhe gjithashtu ka filluar të mësojë se si të kontrollojë automjete dhe anije", tha trajneri i Loganit, Balazs Nemeth.
Në vitin 2021, oficerët e mirëqenies së kafshëve morën një informacion se një qen po abuzohej dhe po mbahej në kushte çnjerëzore në një rezidencë rurale në Hungarinë verilindore. Gjatë një inspektimi në vend, oficerët gjetën Loganin të lidhur në një zinxhir prej një metri dhe vuante nga kequshqyerja.
Javë më vonë, regjimenti i oficerëve trajnues vizitoi strehimoren ku ishte ai dhe filloi vlerësimin e aftësisë së tij për t’u bërë qen profesionist në nuhatjen e bombave.
Komandanti i regjimentit, Zsolt Szilagyi, tha se Logani do të shërbejë në zona të rëndësishme në Hungari, dhe se mund të dërgohet bashkë me ushtrinë e vendit në misionet e NATO-s jashtë.
“Logani është shumë i vlefshëm sepse një nga 10,000 qen të shpëtuar është i përshtatshëm për shërbim ushtarak, nga ana mjekësore dhe psikologjike”, tha ai.
© KOHA.
