Një italian i cili është kapur në përpjekje për të përdorur një krah të rremë për të marrë vaksinën anti-COVID, tani po përballet me akuza.
Një punonjëse e kujdesit shëndetësor i cila ia ka dhënë 50-vjeçarit vaksinën në një qendër vaksinimi në rajonin verior të Piemontes, fillimisht nuk dyshoi për mashtrim. Por më pas, kur ajo preku krahun, vuri re se diçka nuk shkonte dhe e detyroi burrin të hiqte këmishën e tij, shkruan The Guardian.
“Jam ndierë e ofenduar si profesioniste”, ka thënë Filipa Bua për mediat italiane.
“Ngjyra e krahut më bëri të dyshoj dhe për këtë arsye i kërkova atij që ta zbulonte të gjithë krahun. Ishte bërë shumë mirë, por nuk e kishte ngjyrën e njëjtë me lëkurën e trupit”, ka vazhduar ajo.
Italia kohët e fundit njoftoi për masat e reja anti-COVID sipas të cilave do të ndalohet hyrja e personave të pavaksinuar në mjediset si klubet e natës, restorantet, teatrot dhe palestrat.
"Super kalimi i gjelbër", i cili do të hyjë në fuqi më 6 dhjetor, kërkon prova të vaksinimit ose shërimit nga virusi.
Italia regjistroi më shumë se 16,800 raste të reja me COVID-19 dhe 72 vdekje, një ditë më parë. Pak më shumë se 73 për qind e popullatës së këtij shteti është plotësisht e vaksinuar.
-
3 dhjetor 2021 17:21
-
Shpërndaje në: