Shyqri Sahatçiu, orëndreqësi që e ndërroi mbiemrin për shkak të profesionit

Jo fort larg qendrës së Gjilanit, ndodhet dyqani i orëndreqësit Shyqri Sahatçiu.

Ai e kalon pjesën më të madhe të ditës, nën ritmin e akrepave të orës.

Zanatin nuk e ka trashëguar, por e ka përvetësuar me kalimin e kohës, i nxitur nga pasioni i madh që ka për këtë punë, raporton KOHA.

Orëndreqësi gjilanas deri para 20 vjetësh quhej Shyqri Qerimi, por për hir të profesionit, e ndryshoi edhe mbiemrin në Sahatçiu.

Sahatçiu posedon edhe një koleksion orësh të vjetra mbi 100 vjet.

Ndryshe nga orët e tjera në këtë dyqan, akrepat e kësaj ore mjeshtri i ka kurdisur asisoj që të lëvizin prapa.

Sahatçiu i ka pothuajse të gjitha mjetet që i duhen për ta rregulluar një orë.

Edhe pse 72-vjeçar, ai thotë se nuk e ka ndërmend t’i ndahet punës.

Shyqri Sahatçiu, i cili ka gjysmë shekulli që merret me zanatin e orëndreqësit, në dyqanin e tij pret dhjetëra myshterinj për çdo ditë.