Dhjetëra specie të reja të fosileve të kafshëve gjenden në Kinë

Dhjetëra specie të reja të fosileve të kafshëve gjenden në Kinë

25 March 2019 09:22

Mijëra fosile tregojnë detaje mahnitëse të organizmave të detit, të cilat janë gjetur së fundi në Kinë.

Ato përfaqësojnë një sërë speciesh që kanë jetuar deri në 518 milionë vjet më parë, gjatë një kohe kur kishte një rritje të formave jetësore në Tokë.

Gjetjet e reja mund të ofrojnë detaje të reja të jetës gjatë asaj periudhe që njihet si Shpërthimi Kambrian, thonë shkencëtarët.

Paleontologët gjetën fosilet në shkëmbinj në bregun e lumit Danshui, në provincën Hubei të Kinës Jugore.

Në mesin e fosileve u gjetën forma primitive të kandilit të detit, sfungjerë, krimba, alga, dragonjtë e baltës, artropoda, etj.

Shkencëtarët besojnë se shkëmbinjtë tregojnë se çfarë ndodhi në rrëshqitjen e dheut para mi 500 milionë vjetësh, kur jeta në Tokë përjetoi një shpërthim masiv të diversitetit në format e jetës.

4,351 fosile që janë gërmuar deri tani përfshijnë 101 lloje, 53 prej tyre të panjohura më parë për shkencëtarët.

Ndryshe nga gjetjet e fosileve tjera nga periudha Cambri, vendi Qingjiang është unik në atë se jo vetëm që përfshin fosile të ruajtura, por edhe organizma të butë, thuhet në studimin e Universitetit Xi'an.

Më shumë se 50 për qind e zbulimeve mendohet të jenë specie më parë të panjohura, thuhet në studimin e botuar në revistën ‘Science’.

Sipas autorëve, aspektet unike të Qingjiang kanë potencialin për të kuptuar në masë të madhe evolucionin e kafshëve të hershme.

Shpërthimi kambrian, rreth 541 milionë vjet më parë, ishte një periudhë kur një shumëllojshmëri e gjerë e kafshëve shpërthyen në skenën evolucionare.

Para rreth 580 milionë vjetësh, shumica e organizmave ishin të thjeshtë, të përbërë nga qeliza individuale të organizuara rastësisht në koloni.

Gjatë 70 apo 80 milionë vjetëve në vazhdim të kësaj periudhe, shkalla e evolucionit u përshpejtua dhe diversiteti i jetës filloi të ngjante me atë të sotëm./KosovaPress

Komentet

Shto koment

Të ngjashme