Tre muaj nga nisja e seancës konstituive, deputetët “votojnë” për vazhdim të bllokadës

Janë bërë plot 3 muaj qëkur seanca konstituive është hapur, e as të martën deputetët nuk i kanë dhënë zgjidhje ngërçit të krijuar në Kuvend. As në tentimin e 47-të, legjislatura e nëntë nuk është konstituuar. E sikurse herët e tjera, përfaqësues të dy taborëve politikë kanë akuzuar njëri-tjetrin për dështime

Të martën, në ditën kur janë bërë fiks 3 muaj që nga hapja e seancës konstituive, të zgjedhurit e popullit e kanë shënuar dështimin e 47-të për ta formuar legjislaturën e re.

Për 91 ditë, asnjëri nga deputetët e dy taborëve politikë nuk ka lëvizur nga qëndrimet e betonuara, për t’i kontribuuar zhbllokimit të situatës.

Në partinë fituese të zgjedhjeve të 9 shkurtit – Vetëvendosje, kanë vazhduar me insistimin për formimin e Komisionit për votim të fshehtë për kryepalamentarin. E në subjektet që në mandatin e shkuar kanë qenë në opozitë, kanë refuzuar formimin e Komisionit me mospjesëmarrje në votim.

Grupet parlamentare që nuk kanë propozuar emra për anëtarë Komisioni kanë kërkuar që të respektohet rendi i ditës dhe që në votim të dalë propozimi i LVV-së për kryeparlamentarin.

Përfaqësues të tyre janë përpjekur të shprehin qëndrim në foltore për pak sekonda. 

“Për Kosovën, krijimi i unitetit politik nuk është utopi, por domosdoshmëri”, ka thënë Anton Quni, deputet nga radhët e LDK-së.

AAK-ja edhe të martën ka dhënë “propozimin” e njëjtë për anëtar të komisionit.

“Ne si AAK e propozojmë nomadin, Albin Kurti”, ka thënë deputetja Time Kadrijaj (AAK).

E deputetja nga radhët e PDK-së, Eliza Hoxha, ka thënë se partia që përfaqëson 
lufton për respektim të betimit të dhënë të deputetit. 

E kur fjala i është ndërprerë, ajo ka zgjedhur mënyrë tjetër për t’u shprehur.

Ka nxjerr disa letra, të shkruara me fond të madh dhe i ka shfaqur para kamerës. 

Komisioni është nxjerrë në votim, por ka marrë vetëm 51 vota për, të pamjaftueshme për të vazhduar tutje.

Seanca është ndërprerë për të vazhduar pas 48 orëve.

E kur deputetë të Vetëvendosjes e kanë braktisur sallën, ata të partive opozitare kanë nisur diskutimin.

Deputeti i LDK-së, Armend Zemaj, është përkujdesur për zërimin.

“Me këtë gjendje nuk ka kuptim të bëhemi të rrezikshëm për njëri-tjetrin, duhet të jemi unikë si kurrë më parë dhe të rrezikshëm vetëm për ata që nuk e duan Kosovën stabile”, ka thënë deputeti Anton Quni (LDK).

“Po kërkohet votim i fshehtë që askush të mos e kuptojë se ndihma po vjen nga Lista Serbe. Pa perde, pa dorëza, Albulena Haxhiu dhe votimi i fshehtë nuk kalojnë”, ka shtuar deputetja nga radhët e PDK-së, Arbnore Salihu. 

E jashtë sallës, deputeti i LVV-së, Nezir Kraki, ka thënë se subjekti që e përfaqëson nuk llogarit në votat e serbëve, por të shqiptarëve.

“Jo, sepse para se të shpresojmë tek votat e Listës Serbe, janë 50 deputetë përafërsisht shqiptarë, të cilët unë jam i bindur që shumë prej tyre, në vetëdijen individuale, përgjegjësinë individuale që e kanë marrë si deputetë, do të rreshtoheshin për shtetin, për institucionet në momentin që atyre votimi i fshehtë u mundëson të dalin nga presioni i turmës”, ka thënë Kraki.

Vazhdimi i radhës i seancës konstituive do të zhvillohet të enjten (11:00).