Stoltenberg dhe Scholz shprehën pritjen që Kosova e Serbia të ecin para me dialogun

Dialogu Kosovë-Serbi ka qenë temë në takimin që presidenti i Shqipërisë, Bajram Begaj, e pati me sekretarin e përgjithshëm të NATO-s, Jens Stoltenberg, e edhe në atë mes kryeministrit Edi Rama dhe kancelarit gjerman, Olaf Scholz. Begaj kërkoi anëtarësimin e Kosovës në NATO, por për këtë nuk dha ndonjë sinjal Stoltenberg. Ndërkaq, Scholz dhe Rama e theksuan rëndësinë që ka një marrëveshje e shpejtë Kosovë-Serbi.

Përfaqësues perëndimorë kanë përsëritur thirrjen ndaj Kosovës dhe Serbisë për ta pranuar Planin evropian për dialogun.

Sekretari i përgjithshëm i NATO-s, Jens Stoltenberg, pas një takimi me presidentin e Shqipërisë, Bajram Begaj, tha se Plani evropian është mundësi historike për arritjen e një zgjidhjeje.

“Ne mendojmë se kjo është rruga e vetme drejt zgjidhjes dhe stabilitetit në Kosovë. Kemi një mundësi historike e që mund të jetë me përfitim për të gjithë rajonin. Kështu që ne mirëpresim qasjen konstruktive. Është e rëndësishme që të gjitha palët të tregojnë fleksibilitet dhe gatishmëri për kompromis”, tha Stoltenberg.

Plani evropian kërkon nga Serbia që të mos e pengojë Kosovën të anëtarësohet në organizata ndërkombëtare.

Presidenti Begaj shtroi nevojën që Kosova të bëhet pjesë e NATO-s.

Edhe Arbëri 7 mar 2023 NATO: Rast historik për paqe të qëndrueshme mes Kosovës dhe Serbisë

“Ne jemi duke kaluar kohë sfidash të mëdha të cilat kërkojnë vendime të guximshme dhe të drejta. Në këtë kontekst, është në bindjen time se është më se e justifikueshme për të konsideruar anëtarësimin e Republikës së Kosovës në aleancën euroatlantike”, u shpreh Begaj.

Por Stoltenberg nuk dha ndonjë qëndrim për këtë.

“NATO-ja është e pranishme në Kosovë dhe e marrin shumë seriozisht situatën aty dhe ne e mbështesim fort dialogun e lehtësuar nga BE-ja ndërmjet Beogradit dhe Prishtinës”, theksoi ai.

Në anën tjetër presidenti Begaj tha se mendon që përveç prezencës së KFOR-it, edhe Forca e Sigurisë së Kosovës duke qenë prezente në misione të ndryshme ndërkombëtare, beson që do të ishte vlerë e shtuar e Aleancës.

Nevojën që Kosova dhe Serbia të ecin përpara konform Planit evropian për dialogun, e shtruan edhe kancelari i Gjermanisë, Olaf Scholz, dhe kryeministri i Shqipërisë, Edi Rama, pas një takimi që patën në Berlin.

“Ky është një plan i cili mund të zbatohet dhe duhet të realizohet. Prandaj unë jam shumë i gëzuar që ne do të arrijmë në rezultatet konstruktive dhe të mira. Ndjesia ime është që tani mund të bëhet realitet ajo që dukej jo e mundur deri më tani dhe do të ishte mirë për zhvillimin e rajonit dhe Kosovës e Serbinë. Besoj që ky proces do të përfundojë së shpejti me sukses”, theksoi Scholz.

Edhe Arbëri 7 mar 2023 Scholzi sheh “përparime të mëdha” në dialogun Kosovë-Serbi

Ndërsa kryeministri Rama, ka thënë se e mbështesin fuqimisht planin e paqes dhe normalizimit mes Kosovës dhe Serbisë. “Në këndvështrimin tonë është një plan shumë përmbajtjesor dhe shumë realist i cili sjell normalizimin e nevojshëm dhe të shumëpritur dhe të cilin të dyja palët duhet ta trajtojnë jo vetëm me seriozitetin maksimal, por edhe me të gjithë kurajën e domosdoshme”, tha Rama.

Scholz dhe Rama bënë të ditur se 16 tetori është data kur në Tiranë do të mbahet Samiti i Berlinit, i pari samit në kuadër të Procesit të Berlinit që realizohet në rajon.