-
Nga:
Valbona Bytyqi
- 9 nëntor 2023 22:21
- Shpërndaje në:
Kancelari i Gjermanisë është në mesin e tre liderëve të shteteve kryesore të Bashkimit Evropian që Kosovës i ka kërkuar themelimin pa vonesë të Asociacionit të komunave me shumicë serbe, ndërsa Serbisë njohjen de-facto të Kosovës. Të enjten, Scholz ka folur edhe për sigurinë në veri, tek ka thënë se NATO-ja, nëpërmjet misionit të saj KFOR, është garantuese e sigurisë në Kosovë
Kancelari i Gjermanisë, Olaf Scholz, ka theksuar rëndësinë e pranisë së NATO-s në Ballkanin Perëndimor, duke e përmendur rolin e KFOR-it pas tensioneve të fundit në Kosovë.
Në një konferencë për media në Berlin, të mbajtur bashkë me sekretarin e përgjithshëm të NATO-së, Jens Stoltenberg, kancelari Scholz ka thënë se NATO-ja nëpërmjet misionit të saj është garantues i sigurisë në rajon.
“NATO-ja është garantuese i sigurisë në Ballkanin Perëndimor, në Kosovë përmes KFOR-it. Gjermania merr pjesë në këtë mision përmes forcave të armatosura. Tensionet në ditët e fundit kanë ilustruar se sa e rëndësishme është kjo prani dhe që KFOR-i duhet të jetë në pozicion që të reagojë në mënyrë të duhur ndaj të gjitha zhvillimeve”, ka thënë Scholz.
E sekretari Stoltenberg ka vlerësuar Gjermaninë, si një ndër aleatët më të çmuar të NATO-s.
Që nga fundmaji, tensionet në veriun e Kosovës, të banuar kryesisht me serbë, janë rritur shkaku që serbët lokalë i kundërshtuan kryetarët e rinj shqiptarë të komunave. Dhjetëra ushtarë të KFOR-it janë plagosur, kur turma të dhunshme të serbëve i kanë sulmuar ata në protestat kundër kryetarëve të rinj në komunat e veriut që erdhën në pushtet nëpërmjet zgjedhjeve të bojkotuara nga serbët.
E në fund të shtatorit, një grup paraushtarak serb ka sulmuar policinë në Banjskë të Zveçanit, gjatë të cilit është vrarë rreshteri, Afrim Bunjaku.
Pas tensioneve të fundit është rritur prezenca e pjesëtarëve të KFOR-it në Kosovë, kryesisht përreth kufirit me Serbinë. KFOR-i, i cili është reaguesi i tretë i sigurisë në Kosovë, në vazhdimësi ka deklaruar se mund të ndërhyjë nëse është e nevojshme, porse ka inkurajuar Kosovën dhe Serbinë që të zgjidhin mosmarrëveshjet nëpërmjet dialogut që ndërmjetësohet nga Bashkimi Evropian.
Aktualisht, në kuadër të KFOR-it janë 4.353 trupa, 70 prej të cilëve janë nga Gjermania.
